Söykəndiyim qaya  qopub, daş  qopub       
Nəriltisi  yeri, göyü  titrədir... 
Kipriyimin  ucunacan  yaş  hopub  -  
Anlamıram, heç  bu  necə  fitrədir?!.

Bu   gördüyüm bəd  üzüdü həyatın    
Kimsə  boğur  sanki  məni  tək  əllə...   
" Baxıb  gedər"  pıçıldayan  bayatım - 
Sən  dilimdə   qırıq-qırıq  kəkəllə...

Sanki  gəzir  ruhum  indi  hər  yanı,
Xəyalımda  körpülüdü  dağ, aran...
Çəkib  gecə  gözlərimə  al-qanı -
Ya bəlkə də , dan yeridi  ağaran!..

Acısın da  sıxıb  içdim  günlərin  
Bir çiçəyin, bir  gözəlin  adına...
Arasında  dolaşanda  güllərin  
Bir  kəpənək  salar  məni  yadına...