"Ötən illər ərzində görülən işlər nəticəsində Azərbaycan hökuməti süni intellektə hazırlıq indeksi üzrə 195 ölkə arasında artıq 70-ci yerə gəlib çıxıb".

Adalet.az xəbər verir ki, bunu Milli Məclisin Aqrar siyasət komitəsinin iclasında “Kənd təsərrüfatında süni intellektin tətbiqi: nəticələr və perspektivlər” mövzusunda ictimai dinləmədə çıxışı zamanı rəqəmsal inkişaf və nəqliyyat nazirinin müavini Saməddin Əsədov deyib.

“Biz həm yaxın regionda, yəni Mərkəzi Asiyada da orta göstəricidən də yuxarıyıq, ən yüksək yerlərdən birini tutmuşuq. Qafqazda aydın məsələdir ki, ilk yerdəyik. Həmçinin, Birləşmiş Millətlər Təşkilatının elektron hökumətin inkişafı indeksində də biz artıq çox yüksək inkişaf etmiş ölkələr kateqoriyasına daxil olmuşuq”, - deyə nazir müavini bildirib.

S.Əsədov qeyd edib ki, qarşıdakı əsas hədəf bu dinamikanı davam etdirmək, süni intellektin ölkəmizdə dayanıqlı inkişaf, rəqabətqabiliyyətli iqtisadiyyat və səmərəli dövlət idarəçiliyinin aparıcı alətlərindən birinə çevirməkdir.