Bu gün kibertəhlükəsizlik və informasiya təhlükəsizliyi ən aktual mövzulardan biridir.

Adalet.az xəbər verir ki, bunu Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin sədri Fərid Osmanov rəhbərlik etdiyi qurumun Medianın İnkişafı Agentliyi, Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti, Azərbaycan Nəqliyyat və Kommunikasiya Holdinqinin (AZCON) tərkibində fəaliyyət göstərən "AzİntTelekom" MMC ilə birgə təşkil etdiyi "Media subyektləri üçün kibertəhlükəsizlik" mövzusunda seminar və təlimdə bildirib.

"Ölkəmizdə aktiv şəkildə rəqəmsallaşma prosesləri gedir. İnsan cəmiyyətinin, vətəndaş cəmiyyətinin, dövlətin və biznes xidmətlərinin rəqəmsallaşması aparılır. Bu da öz növbəsində fərdi məlumatların təhlükəsizliyinin təmin olunmasını, dezinformasiya ilə mübarizə və məlumatların qorunması istiqamətində fəaliyyətin daha aktiv, koordinasiyalı həyata keçirilməsini zəruri edir. Bu məsələdə mərkəzi nöqtələrdən biri media subyektləridir. Onların informasiya və kibertəhlükəsizlik sahəsində kifayət qədər məlumatlandırılması, bilik və bacarıqlara malik olması, təhlükəsiz infrastruktur qurması, qabaqlayıcı mexanizmlər və alətlər tətbiq etməsi vacibdir. Bu, insan kütləsi ilə kommunikasiya zamanı maarifləndirmə fikirlərinin effektiv şəkildə çatdırılmasına şərait yaradır. Hesab edirik ki, bu tədbirlər davamlı həyata keçiriləcək və sizlər də kifayət qədər faydalanacaqsınız",-deyə o qeyd edib.