“Bu həftə Azərbaycan tarixinin ən önəmli günlərindən biri olan Şuşanın işğaldan azad olunması- Şuşa şəhəri günü qeyd ediləcək. 6 il öncə Prezident, Müzəffər Ali Baş Komandan İlham Əliyev Şəhidlər xiyabanında Azərbaycan xalqına müraciətində böyük fəxarət və qürur hissi ilə Şuşa şəhərinin işğaldan azad olunduğunu bəyan etdi. Həmin gün Azərbaycan tarixinə həmçinin Zəfər günü kimi də düşdü”.

Adalet.az xəbər verir ki, bunu millət vəkili Vüqar Bayramov deyib. 

“İşğal müddətində baxımsız şəhərə çevrilən Şuşa artıq Qafqazın aparıcı yaşayış məntəqələrindən birinə çevrilməkdədir. Şuşa bərpa olunur və yenidən qurulur. Öz tarixinə Zəfərdən sonra yenidən qovuşan Şuşa öz doğma sakinlərini də qarşılamaqdaddır.Zəfərdən sonra Şuşada neçə nəfər daimi məskunlaşıb?Şuşa şəhəri daxil olmaqla Şuşa rayonunda məskunlaşma davam etdirilir. Növbəti Şəhər Gününə hazırlaşan Şuşa rayonu üzrə indiyədək 420 ailə və ya 1579 nəfər daimi məskunlaşıb. Onlardan 377 ailə və ya 1411 nəfər Şuşa şəhərində yaşayır. Hazırda sözügedən rayonun Böyük Qaladərəsi kəndində 78, Kiçik Qaladərəsi kəndində isə 90 vətəndaşımız məskunlaşıb."Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramına" uyğun olaraq məskunlaşmaya start verildi. İkinci Proqram çərçivəsində isə Şuşa rayonu daxil olmaqla işğaldan azad olunan ərazilərimizdə kütləvi məskunlaşma həyata keçiriləcək”, - deyə o, bildirib.

Vasif ƏLİHÜSEYN