Bakıda yerləşən “Xankəndi” məktəbinin Xankəndi şəhərinə köçürülməsi xəbəri hər bir azərbaycanlını ürəkdən  sevindirib və tezliklə Qarabağa qayıdış arzularına daha bir addım yaxınlaşmasına səbəb olub 

Adalet.az xəbər verir ki, buna daha çox sevinən isə Xankəndidəykən 4 saylı Nizami Gəncəvi adına məktəbdə təhsil alan eks məzunlardır. Bu xəbəri Xudiyevlər ailəsi xüsusi biir sevincə qarşılayıb.

Keçmiş polis polkovniki, I Qarabağ müharibəsi  veteranı  Hikmət Xudiyev də adıgedən məktəbin məktəbin məzunlarından olub. Həm də “əlaçı” olub.  O, tarix üzrə fəlsəfə doktoru, tanınmış yazardır , "Əməkdar jurnalist" fəxri adına layiq görülüb.  Xankəndi məktəbinin qürurverən şagirdlərindən olmuş Hikmət müəllimlə əlaqə saxladıq  və onun hazırda hansı hisslər keçirdiyini öyrəndik. Müsahibimiz bildirdi ki,   ilk dəfə ayaq basdığı  o məktəb, o sinif otağı, bizə   evimiz qədər doğma olub: "Baxmayaraq ki, 35 ildir  işğalçılar zor gücü ilə Xankəndini, evimizi, məktəbimizi, şəhərimizi, o şəhərdə  bizə əziz olan  hər şeyi  əlimizdən almışdı, amma biz,  bizə doğma olan o yerləri, nə oralarla bağlı xatirələri, nə də yenidən yurdumuza qayıtmaq ümidimizi itirmədik.  Hazırda xaricdə səfərdə olsam da xəbəri ilk eşidəndə sevincimdən kövrəldim.

Deməli, 4 saylı Nizami Gəncəvi adına məktəb yenidən Xankəndidə fəaliyyət  göstərəcək, mən evimizə, məktəbimizə istədiyim vaxt, dönəcəyəm, uşaqlıq, yeniyetməlik illərində qürurla qapısını açdığım, məktəbin qapısını bir də açacağam... Bilmirəm, yaşadığım sevincin böyüklüyünü sizə  və oxucularınıza çatdıra bilirəmmi?

Mən deyəndə ki, məktəb bizim evimiz idi, bu bənzətmə deyildi. Mənim atam Cəmil müəllim, anam Şura xanım bu məktəbdə dərs deyirdilər, qardaşlarım mərhum Nazim,  İlham, həm də mən bu məktəbin şagirdi olmuşuq. Polisdə işləyəndə məktəb xidməti ərazimə daxil olub. 1 il orada müəllum də  işləmişəm.

Bəlkə də gündəlik vaxtımızın çoxu evdə yox 4 N-li məktəbdə keçirdi.Təsəvvür edirsiniz, atamın, anamın, qardaşımın ruhu çoxdan Xankəndidədir. Xankəndi üçün , Qarabağ üçün canından keçən şəhidlərimizin, “yurd” haraylaya-haraylaya əbədiyyətə qovuşan müəllimlərimin, gözləri  hər yerdə Xankəndi axtaran, bu günü görməyə əcəl aman verməyən  camaatımızın ruhunun  orada bizi gözlədiyinə inanıram.  Mən o ruhlara  təzim etməyə gedəcəyəm ”.

Hikmət müəllim onu da bildirdi ki, Xankəndidə Nizami Gəncəvi adına tam orta məktəb 1945-ci ildə fəaliyyətə başlayıb. 1988-ci ildə ermənilərin Xankəndini işğal etməsindən sonra məktəb fəaliyyətini dayandırıb. Dövlət başçı Prezident İlham Əliyevin 30 dekabr 2012-ci il tarixli sərəncamı ilə məktəbin fəaliyyəti yenidən bərpa olundu. Sərəncama əsasən Bakının Sabunçu rayonunda köçkünlər üçün salınmış Şuşa şəhərciyində müasir standartlara uyğun məktəb inşa edilib istifadəyə verildi. Hazırda məktəbimiz  Ramanada fəaliyyət göstərir .

 Söhbətləşdi Əntiqə Rəşid