Almanların «Leopard» tankı  hələ ki dünyada ən güclü, əvəzsiz döyüş  texnikası sayılır. Bir dəfə Moskva  televiziyalarının birində almanların ukraynalılara «Leopard» tankı verdiyi ilə bağlı müzakirə gedirdi. Aparıcı verilişdə olan bir generaldan soruşdu ki, bu tankı  vurmaq olmur, yanmır?    

General təbəssümlə dedi:

- Suriyada vururduq, elə çırtaçırtla yanırdı ki.

İndi Fransa «dəliyə yer ver, əlinə tank ver» fəlsəfəsi ilə Ermənistana külli miqdarda zirehli texnika, silah-sursat, hava hücumundan  müdafiə sistemləri və sairə və ilaxır  bağışlayıb. Ermənistanı yenidən müharibəyə həvəsləndirir. Bircə Qənimətlər  parkımızda Makronun  texnikalarının  yeri əskikdi. Xeyli  ərazi də  boşdu, yəni Ermənistan Makrona çox güvənməsin. 

Biz müharibə istəmirik, sülh istəyirik. Əgər Ermənistan hələ ağıllanmayıbsa və savaş istəyirsə onu alar.   Biz savaş istəmirik, biz bizimlə savaşanlarla savaşırıq. 

Əslində erməni xalqı da savaşmaqdan yorulub. Makron kimi yuxa qulağı sulayanlar  olmasa yəqin ki, Ermənistan da  sülh istəyər.