Tədqiqatçılar tərəfindən aparılan və nəticələri "Sleep Advances" jurnalında dərc olunan yeni araşdırma maraqlı bir ziddiyyəti üzə çıxarıb: qadınlar kişilərlə müqayisədə daha çox pis yatdıqlarını düşünsələr də, obyektiv göstəricilər bunun əksini göstərir.

Adalet.az xəbər verir ki, araşdırmada yaşı 29-85 arasında dəyişən 476 İsveç sakini iştirak edib. İştirakçıların sayı qadın və kişilər arasında bərabər bölünüb. Onların yuxusu bir gecə ərzində polisomnoqrafiya üsulu ilə izlənilib. Bu metod yuxu zamanı beyin fəaliyyətini, tənəffüsü və hərəkətləri qeydə alır. Səhər isə iştirakçılar yuxularının keyfiyyətini özləri qiymətləndiriblər.

Nəticələr gözlənilməz olub. Qadınlar daha çox yuxudan şikayət etsələr də, cihazların qeydlərinə görə onlar demək olar ki, bütün əsas göstəricilər üzrə kişilərdən daha yaxşı yatıblar.

Məlum olub ki, qadınlarda gecə oyanmaları daha az olub, onlar daha uzun müddət yatıblar, dərin yuxuda daha çox vaxt keçiriblər və yataqda keçirdikləri vaxtdan daha səmərəli istifadə ediblər. Başqa sözlə, fizioloji baxımdan onların yuxusu daha keyfiyyətli olub.

Alimlər bu paradoksun mümkün izahını da tapıblar.

Araşdırma göstərib ki, qadınlar gecə baş verən oyanmaları daha dəqiq xatırlayırlar. Kişilər isə qısa müddətli oyanmaları çox vaxt ya hiss etmir, ya da sonradan xatırlamırlar.

Məsələn, kişi bir neçə saniyə və ya dəqiqəlik oyandıqda, adətən yenə də bütün gecəni yaxşı yatdığını düşünür. Qadınlar isə ən qısa oyanmaları belə nəzərə alaraq yuxularını qiymətləndirirlər.

Tədqiqatçılar qısa və demək olar ki, hiss olunmayan oyanmaları yaşayan kişiləri analizdən çıxardıqda, qadın və kişilərin yuxu ilə bağlı subyektiv qiymətləndirmələri arasındakı fərq demək olar ki, aradan qalxıb.

Araşdırmanın rəhbəri Torbyörn Okerstedt bildirib ki, kişilərin yuxularını daha müsbət qiymətləndirmələrinin səbəbi məhz bu qısa gecə oyanmalarını zəif xatırlamaları ola bilər. Bu fərqin niyə yarandığı isə hələlik məlum deyil.

Araşdırma həmçinin göstərib ki, yaş artdıqca fərqlər daha da nəzərə çarpır. Yaşlı kişilərdə dərin yuxunun keyfiyyəti azalır və gecə oyanmalarının sayı artır. Qadınlarda da yaşla bağlı dəyişikliklər baş verir, lakin onlar daha zəif ifadə olunur. Buna baxmayaraq, yaşlı qadınlar da yuxularını kişilərə nisbətən daha çox qeyri-qənaətbəxş hesab etməyə davam edirlər.