“Tibb vasitələrinin dövlət qeydiyyatı onların Azərbaycan Respublikasında dövriyyəsinə və istifadəsinə icazə verilməsi üçün əsas hüquqi mexanizmlərdən biridir. Bununla yanaşı, qeydiyyata alınmış tibb vasitələrinin təhlükəsizliyi, keyfiyyəti və effektivliyi bazarda olduqları müddət ərzində də nəzarətdə saxlanılır. Bu nəzarətin əsas məqsədi insan sağlamlığının qorunması, potensial risklərin vaxtında müəyyən edilməsi və zəruri tənzimləyici tədbirlərin görülməsidir”.

Adalet.az xəbər verir ki, bunu “Sağlam radio”nun (93 FM) “Sağlam səhər” verilişində Səhiyyə Nazirliyinin Analitik Ekspertiza Mərkəzinin Tibb vasitələrinin qeydiyyat-ekspertiza və idxalı şöbəsinin müdir müavini Telli Əlizadə deyib.

Onun sözlərinə görə, Azərbaycan Respublikası Nazirlər Kabinetinin 18 iyul 2024-cü il tarixli qərarı ilə təsdiq edilmiş “Dərman vasitələrinin, dərman maddələrinin və tibb vasitələrinin dövlət qeydiyyatına alınması, dövlət reyestrinə daxil edilməsi və dövlət reyestrinin aparılması Qaydaları”nın 12-ci bəndinə əsasən, tibb vasitəsinin dövlət qeydiyyatı haqqında şəhadətnamə qanunvericilikdə nəzərdə tutulmuş hallarda ləğv edilə bilər.

“Qaydaların istinad etdiyi ‘Lisenziyalar və icazələr haqqında’ Qanunun 26-cı maddəsinə əsasən, icazənin alınması üçün təqdim edilmiş məlumat və sənədlərin yanlış və ya saxta olması, icazə sahibinin müraciəti, icazənin verilməsinə əsas olmuş halların aradan qalxması, eləcə də qanunvericilikdə müəyyən edilmiş digər hallar qeydiyyatın ləğvi üçün əsas hesab olunur. Belə hallarda təqdim olunmuş məlumatlar və faktlar qiymətləndirilir, zərurət yarandıqda araşdırma aparılır və müvafiq qərar qəbul edilir.

Tibb vasitələrinin dövriyyədən sonrakı təhlükəsizlik monitorinqi onların istifadəsi zamanı yarana biləcək risklərin vaxtında müəyyən edilməsində mühüm rol oynayır. Hazırda qüvvədə olan qanunvericilikdə dərman vasitələrində tətbiq edilən farmakonəzarət sistemindən fərqli olaraq, tibb vasitələri üzrə arzuolunmaz hadisələrin bildirilməsi üçün ayrıca məcburi mexanizm nəzərdə tutulmayıb. Bununla belə, istifadə zamanı aşkar edilən nasazlıqlar, təhlükəsizlik problemləri, texniki uyğunsuzluqlar və ya insan sağlamlığı üçün risk yarada biləcək digər hallar barədə məlumatlar Analitik Ekspertiza Mərkəzinə rəsmi məktub və ya elektron poçt vasitəsilə təqdim oluna bilər. Müraciətlərdə hadisənin mahiyyəti, istifadə edilmiş tibb vasitəsi, başvermə şəraiti və qiymətləndirmə üçün əhəmiyyətli digər məlumatların göstərilməsi məqsədəuyğundur. Daxil olan məlumatlar mütəxəssislər tərəfindən təhlil edilir, risk qiymətləndirilir və zərurət olduqda əlavə araşdırmalar aparılır”.

T. Əlizadə qeyd edib ki, bu sahədə Azərbaycan Respublikası Nazirlər Kabinetinin 27 noyabr 2019-cu il tarixli Qərarı ilə təsdiq edilmiş “Dərman vasitələrinin geri çağırılması Qaydası” xüsusi əhəmiyyət daşıyır: “Qaydanın 1.3-cü bəndinə əsasən, dərman maddələri ilə yanaşı, yüksək risk qrupuna daxil olan tibb vasitələri – invaziv tibb vasitələri və tibbi qazlar da bu Qaydanın məqsədləri üçün dərman vasitələrinə bərabər tutulur. Buna görə də həmin məhsullarla bağlı təhlükəsizlik, keyfiyyət və ya effektivlik riskləri müəyyən edildikdə, qanunvericiliyə uyğun olaraq onların geri çağırılması həyata keçirilə bilər. Bu mexanizm potensial təhlükəli məhsulların dövriyyədən çıxarılmasına və insan sağlamlığının qorunmasına xidmət edir. Beləliklə, dövlət qeydiyyatı sistemi, qeydiyyatdan sonrakı nəzarət və risklərin idarə olunması mexanizmləri tibb vasitələrinin təhlükəsiz istifadəsinin təmin edilməsinə, potensial risklərin minimuma endirilməsinə və əhalinin sağlamlığının qorunmasına xidmət edir”.