"Bakıda xeyli sayda çox bahalı və böyük fitness idman zalları var. Böyükdən, kiçiyə heç birində ilkin təcili yardım göstərmək üçün ixtisaslı həkim yoxdur". 

Adalet.az xəbər verir ki, bunu iqtisadçı ekspert Razi Abasbəyli deyib. 

Ekspert bildirib ki, ən kiçik idman yarışında belə yarışa həkim briqadası cəlb edilir: 

"Təsəvvür edin ki, Bakıda elə idman zalları var ki, bir zalda eyni anda 100 nəfərdən çox insan məşq edir. Həm də ağır atletika üzrə. İnsanlar çox vaxt həkim məsləhəti olmadan əlavə enerji tərkibli dərmanlardan istifadə edir. 

Məşqə gələnlərin təzyiqini ölçməyə belə cihaz olmur zalda. 
Biri xəsarət alsa, ilkin tibbi yardım göstərmək üçün xüsusi ixtisaslı tibb işçisi belə olmur. 

Bu kifayət qədər ciddi bir problemdir. İddia etmirəm. 

Bəlkə hansısa idman zalında həkim və ya ixtisaslı tibb işçisi var. Lakin son baş verənlər və görüntülər onu deməyə əsas verir ki, bu problemi ciddi nəzarətdə saxlamaq lazımdır. 

Fitnes zallarına kim lisenziya verir? Bu lisenziyaların tələbində ilkin təcili tibbi yardım göstərmək üçün hansı şərait qurulmalıdır?
Bunu təşkil etməli olub, etməyənlər, məsuliyyətsizlik edənləri hansı cəza gözləyir?". 

Vasif ƏLİHÜSEYN