Xəbər verdiyimiz kimi, Göygöldə saatda 220 kilometr sürətlə hərəkətdə olan avtomobillə qəza düşən dörd dostun ikisi dünyasını dəyişdi, ikisi isə ağır yaralanıb. Hadisəni mobil telefonla videoya çəkən gənclər məhz yüksək sürətə görə canlarından olublar. 

Məsələylə bağlı Adalet.az-a danışan nəqliyyat üzrə ekspert Elməddin Muradlı gənclərimizin yüksək sürət həvəsinin həyatları üçün təhlükəli olduğunu bildirib:

“Bu çox təhlükəli bir oyundur və bu əməllərdən ancaq və ancaq uzaq durmaq lazımdır. Yüksək sürət, təhlükəli manevrlər heç kimə xeyir gətirməyib və bundan sonra da kiməsə xeyir gətirəcəyini düşünmürəm. Gənclər daha faydalı, daha ağıllı işlərlə məşğul olsalar daha yaxşı olar. Bu məsələlərlə bağlı Dövlət Yol Polisi tərəfindən müraciətlər, xəbərdarlıqlar olunub. Valideynləri də məsuliyyətli olmağa çağırıram ki, uşaqlarını maşınlardan uzaq tutsunlar. Çünki nəqliyyat vasitəsi yüksək təhlükə mənbəyidir və bunlarla hər hansısa bir zarafat ağır faciə ilə nəticələnir. Biz artıq bir neçə dəfə belə ağır faciələrin şahidi olmuşuq və çox ciddi sarsıntı keçiririk. Düşünürəm ki, bu istiqamətdə təbliğat işlərini daha da gücləndirmək lazımdır və valideynlərin bir az da məsuliyyətli olması üçün çağırışları, müraciətləri intensiv şəkildə KİV, TV və radiolarla çoxaltmaq lazımdır”. 

Vasif ƏLİHÜSEYN