Ağır taxtalı kişi Firudin Şuşinski əsərlərinin birində Lenindən sitat gətirərək yazır: «Lenin deyib ki…» 

Rəhmətliyin o qədər düşməni vardı ki, həm özümüzdən, həm də ermənilərdən, həmin düşmənlər yığışıb Leninin əsərlərini ələk-vələk edirlər, amma Firudin Şuşinskinin yazdığı sitatı tapa bilmirlər. Və şikayət edirlər ki, Lenin heç vaxt belə bir şey yazmayıb. 

Firudin bəyi çağırırlar yuxarı, «yuxarı» sözünü də başa düşdüz də, deyirlər ki, göstər görək Lenin hansı əsərində yazıb bunu.  

Bəy gülüb deyib:

- Lenin onu yazmayıb ey, deyib, Peterburqda bir iclasda. Mən də həmin iclasdakı  məsləkdaşlardan eşitmişəm. 

Şah İsmayıl davası qurtardısa, mən də Şah babamızdan bir bənd demək istəyirəm. 

Deyib ki:

Türk dilim  dövlət dilimdir,
mənəvi varlığım, qeyrət dilimdir!

Qoy indi Şah İsmayılı sevməyənlər məni topa tutsunlar ki, bunu harda deyib, nə vaxt deyib?

Narahat olmayın, cavabım hazırdır.

Aqil ABBAS