Aqil Abbas Ağcabədi rayonunun Sarıcalı kəndində  Qarabağ müharibəsində şəhid olmuş Habil Baxışovun 94 yaşlı anası Reyhan Baxışovanı evində ziyarət etmişdir.

Həyat yoldaşını vaxtsız itirən  Reyhan xanım 8 uşağı necə əzab-əziyyətlə böyütdüyündən danışmış və qeyd etmişdir ki, onların heç bir maddi ehtiyacı yoxdur. Amma onu da xüsusilə vurğulamışdır ki, oğlu Habil şəhid olandan sonra gəlib onların mənzil şəraiti  ilə maraqlandılar və mənzil şəraitinin ağır olduğunu söyləyərək şəhid ailəsinə yeni ev tikəcəklərini  bildirdilər. Və yeni tikiləcək  ev üçün həyətdəki ağacları da kəsdilər. Aradan uzun müddət keçməsinə baxmayaraq, nə ev tikən oldu,  nə də sonradan onlarla maraqlanan. 

Millət vəkili söz verdi ki, bu problemi araşdıracaq və yeni evin tikilməsi üçün aidiyyatı təşkilatlar qarşısında məsələ qaldıracaq. Reyhan xanım demişdir:
- Oğlum Habil canını Vətən yolunda qurban verəndə fikirləşməmişdi ki, hökumət gəlib bizə ev tikəcək. Heç biz də belə bir şey fikirləşməmişdik. Amma gəldilər, evimizi pis vəziyyətdə görəndən sonra özləri dedi ki, sizə yeni ev tikəcəyik. Məni yandıran evin tikilməməsi deyil, məni yandıran dövlət məmurlarının yalan danışmasıdır.