Ruhunu cavanlıq naminə şeytana satmış canlı "Dorian Qrey” adlandırılan "Playboy” jurnalının yaradıcısı Hyu Hefnerin erotik səltənəti artıq diqqət çəkmədiyindən reytinq qurbanına çevrilib. 50-ci illərdən bu yana fasiləsiz olaraq dünyanın səhnə gözəllərini yataq otağından çıxarıb üz qabığına daşıyan jurnal əvvəlki kimi geniş oxucu kütləsinin marağında deyil. Səltənəti çökən Hefner də qocalıqda yorğalığına istirahət verərək daha qadınları tamamilə çılpaq deyil, yarımçılpaq çəkməyə qərar verib. Jurnalın tirajını da əhəmiyyətli dərəcədə azaldıb.  

Hefner etiraf edir ki, müasir texnologiyanın ən böyük zərəri ona dəyib: "İndi azyaşlı uşaq da cürbəcür pornosaytlara girib, ürəyi istədiyi fantaziyanı qura bilər. O ki qaldı yetkin kişi ola! Bu qədər əl altındakı vasitələrin olduğu bir vaxtda kimdir jurnalda çılpaq qadın şəkli axtaran?.. Odur ki, məşhur qadınlara da dünyanın pulunu sərf eləməyə ehtiyac qalmır. "Playboy” dövranını başa vurub”.

"Dorian Qrey” erotik səltənətinə 1953-cü ildən başlayıb. Daha doğrusu, rəsmən dərc olunub. Buna qədər Hefner hərbi xidmətdəykən zəif, qorxaq, buyruqqulu olduğu üçün kazarmaları silib-süpürəndə əsgərlərin öz yastıqlarının altında saxladıqları, başları üzərində divara vurduqları çılpaq qadın şəkillərini görüb belə bir fikrə gəlir: çılpaq gözəllərin şəkilləri aylarla, hətta illərlə qadın üzünə həsrət qalan kişilər üçün yeməkdən də vacibdir. Elə kazarmadaca şəkil ticarətinə başlayır. Mülki dostlarından xahiş edir ki, ona davamlı olaraq çılpaq qadın şəkilləri göndərsinlər. İnternetin olmadığı, yalnız bir kanalın mövcud olduğu, pornoqrafiyanın yasaq dönəmində belə şəkilləri ya natura çəkən rəssamlardan, ya da gizli fotostudiyaların özəl kolleksiyalarından əldə etmək mümkün idi. Hefnerin müxbir dostları bu işi asanlıqla görürlər. Hər halda işin nəticəsində yaxşı pul qazanırdılar. Ailələrindən qəpik-quruş qoparda bilən əsgərlər onlara hava-su kimi lazım olan "kağız sevgili”lərə heyfislənmədən pul xərcləyirdilər. Beləcə, hərbi xidmətdə həm pul, həm də ideya qazanmış Hyu tezliklə öz jurnalını yaradır. Jurnalın ilk sayına hətta nömrə də qoymur, qorxur ki, belə dərgiyə görə onu daşa basar, tezliklə yayımı dayandırarlar. Amma düşüncəsi qurşaqdanaşağı olanların, yasaqlara susamış zəngin oxucuların sayəsində "Playboy” dövrünün ən çox satılan, izlənilən dərgisinə çevrilir. Jurnalın ilk üz qabığını Monro öz çılpaq şəkilləri ilə bəzəyib. İstedadından çox gözəlliyi ilə şöhrət qazanmış Merlin Monronun şirnikləndirici şəkilləri sayəsində jurnal 7 min tirajla satılır. Sobadan çıxmış isti kökə kimi bir anda satılılan jurnal hər ikisinin şöhrət dünyasına bileti olur. Merilin Monro tanınmış aktrisa olsa da həmin dövrdə zirvə uğrunda mübarizə apardığı bir neçə gözəl aktrisalarla çarpışmalı olurdu. (Sonralar Monro bu hərəkətinə görə özünü çox qınadı. Hefnerə lənətlər yağdırdi ki, bu şəkillər və ondan sonra gələn "çılpaq şöhrət”i onu bədbəxt edib. Heç bir kişi – hətta ərləri də ona ciddi yanaşmayıb) . "Playboy”dakı şəkilləri ilə Monro ABŞ-ın ən seksual gözəli adını möhürləmiş oldu. Hefner isə ölkənin ilk leqal seks-biznesinin başına keçdi. Dünyanın ən tanınmış gözəlləri – Elizabet Teylor, Tina Törner, Madonna, Sindi Krauford, Şeron Stoun, Naomi Kempbell, Monika Belluçi, Pamela Anderson, Nikol Kidman, Karmen Elektra, Demi Mur, Culiya Roberts, Uma Turman, Vaynona Rayder, Şarliz Teron, Anjelina Coli,  Skarlet Yoxanson, bir sözlə qərbin gəlmiş-getmiş gözəlləri jurnalın üz qabığından boylanaraq anadangəlmə "geyim”ləri ilə uzun illər nə ürək infarktlarına səbəb olublar...  Yeri gəlmişkən, vaxtilə sovet gözəlləri də bu jurnallarda boy veriblər (balerinalar Stalina Azamatova, Yelena Ryabkina, Kseniya Ryabkina, Yelena Matveyeva, aktrisa Eva Murnietse). Amma sovet höküməti bu faktı gizli saxlayıb. Jurnalların böyük hissəsini alaraq sadə vətəndaşlara ötürülməsinin qarşısını alıb.  

Amerikansayağı hərəmxana

"Mən heç vaxt "Playboy”u seks jurnalı hesab eləməmişəm. Sadəcə, bu jurnal seksin ayrılmaz bir hissəni təşkil etdiyi həyat obrazıdır” – deyən Hefnerin bu boğazdanyuxarı fikirləri müsahibə üçün desə də, seks onun və havadarları üçün təkcə həyatın bir hissəsi deyil, bütöv bir tamına çevrildi. Tezliklə hər kəsə bəlli oldu ki, "Playboy” gözəlləri fotoçəkilişlərdən sonra Hefnerin məşhur villasında dünyanın ən zəngin kişilərinin müvəqqəti əyləncəsinə çevrilir. Özünəməxsus uniformada – yarımçılpaq dovşan kimi geyinmiş qızların çoxu hərəmxanada daimi yaşamağa başladılar. Hefner özü bu gözəllərdən 7-si ilə yaşayırdı. Digərlərini də dişinə vursa da ,7 "həyat yoldaşı” ilə kifayətlənməli oldu. Çünki digər gözəllərin öz sahibləri vardı. Hərəmxanada əylənən təkcə iş adamları deyildi, onların arasında tanınmış siyasətçilər, zəngin yazıçı və rejissorlar da olurdu. Kütləvi azğınlıqlar haqqında qəsrin divarlarından kənarda çox əfsanələr dolaşmağa başladı. Deyilənə görə, dəfilədən, fotostudiyadan, hətta Hollivud çəkilişlərindən çıxan gözəllər bu qəsrdə hər cür seksual təhqirlərə məruz qalırdılar. Təbii ki könüllü şəkildə - gördükləri xidmətin müqabilində isə aldıqları maaşın 3-4 qatını qazanırdılar. Dünyanın hər millətindən olan bu gözəllərin "istifadə müddəti” 10 ildən artıq olmurdu. Yaşı 35-i keçən qızların yerini təzə fidanlar tuturdu.

Qocalmayan şeytan

Qoca görkəmində olsa da, özünü cavanlardan daha şux aparması ilə tanınan Hefner haqqında da rəvayətlər dolaşmağa başlayır. İngilis yazıçısı Oskar Uayldın məşhur "Dorian Qreyin portreti” əsərinin real qəhrəmanı olduğunu deyənlər günü gündən artır. Həqiqətən də, onun favorit gözəllərinin sonralar dediyinə görə, hər kəsdən qoruduğu iş kabinetinin divarında Dorian Qreyin portreti və öz rəsmi asılıb. Bu portretlər arasında isə həddən artıq bənzərlik vardı. Hefner Dorian kimi ruhunu şeytanamı satmışdı. Ya doğrudanmı əsər onun haqqında yazılmışdı?! Onu belə cavan saxlayan nə idi?! Cavab əslində qabaqcadan hazırdı: dünyanın həsrət çəkdiyi gözəllər, bu gözəllərə sahiblənmə kimi kişi təkəbbürü (fikir vermisinizzsə, ən sərt, ağırtəbiət kişilər belə yanlarında gözəl qadın gəzdirəndə burunları avtomatik olaraq yuxarı qalxır), qayğısız, zəngin həyat, nüfuzlu havadarlar... Təsadüfi deyildi ki, bu açıq-saçıq jurnala dünyanın ən nüfuzlu adamları müsahibə verirdi. Məsələn, Yasir Ərəfat. Adam Asiyada oturub dini şəriətdən dərs keçir, Amerikada isə lüt qızların arasından boylanır. Güman ki ərəb ənənələrini qərbdə davam etdirən həmfikirinə sayğılarından müsahibəyə razılıq veribmiş... Martin Lüter Kinq, Fidel Kastro, Daniel Orteqa və digər nüfuzlu şəxslər "Playboy”dan keçən saqqallı "boy”lar olub.

Amma, bütün səltənətlərin süqutu da qaçılmazdır. Dorian Qreyin portretinin də korlanıb yırtıldığı an gəlib çatmalı idi, çatdı da. Artıq Hyu Hefner dırmaşdığı çılpaq dağların zirvəsindən üzüaşağı yumallanaraq uçuruma deyil, birbaşa torpağın altına gedir. Maraqlıdır, onun daşıdığı (deyilənə görə gizli lentə aldığı) sirlər də torpaq altına gedəcəkmi?

Şəfiqə ŞƏFA