Ukraynanın xarici işlər naziri Andrey Sibiqa ilə Avropa diplomatiyasının rəhbəri Kaya Kallas Ankarada keçirilən görüşdə Ukraynanın Avropa İttifaqına üzvlük prosesi və Rusiyaya qarşı təzyiqlərin artırılması məsələlərini müzakirə ediblər.

Adalet.az xəbər verir ki, Sibiqa "X" sosial şəbəkəsində paylaşdığı məlumatda bildirib ki, görüş zamanı son Rusiya hücumları və onların nəticələri barədə Kallasa məlumat verib. O, həmçinin Ukraynanın hava hücumundan müdafiə sisteminin gücləndirilməsinin, xüsusilə də ballistik raket təhdidlərinə qarşı müdafiənin həyati əhəmiyyət daşıdığını vurğulayıb.

Nazir əlavə edib ki, görüşdə sülh prosesinin gedişi, Avropanın bu prosesdəki rolu, eləcə də Ukraynanın Aİ-yə inteqrasiyası istiqamətində atılacaq növbəti addımlar da müzakirə olunub.

Sibiqa Ukraynaya göstərdiyi dəstəyə görə Kaya Kallasa və Avropa İttifaqına təşəkkürünü ifadə edib.

Qeyd edək ki, görüş Ankarada keçirilən NATO ölkələrinin dövlət və hökumət başçılarının sammiti çərçivəsində baş tutub.