Şirvanda yaşlı qadının pulunu oğurlayıblar.

Adalet.az xəbər verir ki, hadisə şəhər ərazisində yerləşən bankomatlardan birinin qarşısında baş verib. 

Hadisənin görüntüləri sosial şəbəkələrdə yayılıb.

Videoda yaşlı qadının bankomatdan pul çıxararkən yardım aldığı şəxs tərəfindən aldadıldığı görünür. İddialara görə, kimliyi məlum olmayan şəxs qadına kömək etmək adı ilə onun kartından pulu çıxarıb və pulları götürərək ərazidən uzaqlaşıb. Qadın onun arxasınca qaçsa da, kişi ərazidən sürətlə uzaqlaşıb.

Faktla bağlı Daxili İşlər Nazirliyinin Şirvan regional qrupunun baş inspektoru, baş leytenant Nizam Həmidov Oxu.Az-ın sorğusuna cavab olaraq bildirib ki, faktla bağlı Şirvan Şəhər Polis Şöbəsinə müraciət daxil olub.

O bildirib ki, sentyabrın 6-da Şirvan şəhər sakini olan bir qadın “102” xidmətinə, daha sonra isə Şirvan Şəhər Polis Şöbəsinə ərizə ilə müraciət edib:

“O, şəhər ərazisində yerləşən bankomatların birindən pul çəkərkən zaman tanımadığı bir şəxsdən kömək istədiyini, lakin sonuncunun kartdan pul çəkdikdən sonra həmin ərazidən uzaqlaşdığını və ona məxsus 200 manat pulu soyğunçuluq yolu ilə ələ keçirdiyini bildirib.

Daxil olan müraciətlə bağlı hazırda Şirvan Şəhər Polis Şöbəsinin İstintaq Bölməsində araşdırmalar aparılır. Hadisəni törədən şəxsin müəyyən edilərək məsuliyyətə cəlb olunması istiqamətində əməliyyat-istintaq tədbirləri davam etdirilir”.