Soyuq havalarda virus infeksiyalarına yoluxma riski artır. Xüsusilə qapalı və havasız məkanlarda uzun müddət qalmaq tənəffüs yolu xəstəliklərinin yayılmasını sürətləndirə bilər.

Adalet.az xəbər verir ki, mütəxəssislər soyuq havalarda viruslardan qorunmaq üçün bir sıra sadə qaydalara əməl etməyi tövsiyə edirlər.

Əlləri mütəmadi yumaq, gözə, buruna və ağıza çirkli əllərlə toxunmamaq infeksiyalardan qorunmağın əsas yollarındandır. İnsanların sıx olduğu qapalı məkanlarda otaqların mütəmadi havalandırılması da vacibdir.

Orqanizmin müqavimətini qorumaq üçün balanslı qidalanmaq, kifayət qədər su içmək və normal yuxu rejiminə riayət etmək lazımdır. Soyuq havalarda hava şəraitinə uyğun geyinmək də tövsiyə olunur.

Öskürən və ya asqıran zaman ağız və burnu salfet və ya dirsəyin iç hissəsi ilə örtmək, istifadə edilmiş salfeti dərhal tullamaq vacibdir. Xəstəlik əlamətləri olan şəxslərin mümkün qədər evdə qalması və digər insanlarla yaxın təması azaltması da virusların yayılmasının qarşısını almağa kömək edir.

Qripə qarşı peyvənd isə xüsusilə risk qrupunda olan şəxslər üçün qorunma vasitələrindən biridir. Xroniki xəstəliyi olanlar, yaşlı insanlar, hamilələr və immun sistemi zəif şəxslər peyvənd və digər profilaktik tədbirlər barədə həkimlə məsləhətləşməlidirlər.

Mütəxəssislər yüksək hərarət, nəfəs darlığı, sinə ağrısı və ya vəziyyətin sürətlə pisləşməsi kimi əlamətlər müşahidə olunduqda həkimə müraciət etməyi məsləhət görürlər. (axşam.az)