Suriyada Cebse Qaz Zavodundan qaz tədarük edən boru kəmərində partlayış olub.

Adalet.az xəbər verir ki, bu barədə Suriya Milli Neft Şirkəti (SPC) açıqlaması yayıb.

Bildirilib ki, partlayışdan sonra boru kəmərində qaz axını dayandırılıb, quyular təcrid olunub, təhlükəsizlik klapanları bağlanıb və ərazidə təhlükəsizlik tədbirləri görülüb.

SPC bildirib ki, partlayışdan dərhal sonra təmir qrupları əraziyə cəlb olunub. İşlərin fasiləsiz davam etdiyi və boru kəmərinin yenidən istifadəyə verilməsi üçün bütün imkanların səfərbər edildiyi qeyd olunub.

Qaz təchizatının dayanması bəzi elektrik istehsal edən turbinlərin yanacaq təminatına da təsir göstərib. Yaranan çatışmazlığın mövcud alternativ mənbələr hesabına aradan qaldırılması üçün Suriya Elektrik Şirkəti ilə koordinasiya yaradılıb.

Hadisə nəticəsində heç bir işçinin xəsarət almadığı bildirilib.

SPC-nin məlumatına görə, ilkin araşdırmalar partlayışın təxribat nəticəsində baş vermiş ola biləcəyini göstərir.

Hadisənin səbəblərinin tam müəyyənləşdirilməsi üçün müvafiq qurumlarla birgə istintaq aparılır.