“BMT Baş Assambelyasının hər ilin sentyabrında keçirilən sessiyalarına üzv dövlətlərin liderləri və xarici işlər nazirləri qatılırlar. Liderlər Baş Assambelyadakı çıxışlarında ölkələrinin xarici və təhlükəsizlik siyasətlərindən, o cümlədən əsas beynəlxalq problemlərdən danışırlar”. 

Adalet.az xəbər verir ki, bunu politoloq Elxan Şahinoğlu deyib. 

Politoloqun sözlərinə görə, BMT sessiyada səsləndirilən problemlərin əksəriyyətini həll etmək iqtidarında deyil: 

“BMT nə Rusiya-Ukrayna müharibəsini, nə də İsrailin Qəzzadakı hərbi əməliyyatını dayandıra bilir. Liderlərin əksəriyyəti BMT çərçivəsində islahatların aparılması vacibliyindən də danışırlar. Türkiyə Cumhurbaşqanı Rəcəb Tayyib Ərdoğan sessiyadakı çıxışlarında hər dəfə BMT Təhlükəsizlik Şurasının 5 daimi üzvünü nəzərdə tutaraq “dünya 5-dən böyükdür” fikrini səsləndirir. Ancaq bu çağırışlara rəğmən, nə BMT-də islahatlar aparılır, nə də Təhlükəsizlik Şurasının üzvlərinin sayı artır. Çünki, daimi üzvlər sıralarının genişlənməsini istəmirlər”.

Vasif ƏLİHÜSEYN