İranın Təbriz şəhərini təmsil edən “Traktor” futbol klubu İranda yaşayan türklərin dil hüquqları və assimilyasiya siyasəti ilə bağlı paylaşım edib.

Adalet.az xəbər verir ki, klubun paylaşımında İranda yaşayan türklərin ana dilində təhsil almaq imkanlarının məhdudlaşdırıldığı iddia olunub. Bildirilib ki, müsəlmanların hüquqlarını müdafiə etdiklərini deyən şəxslər İranda türklərin üzləşdiyi problemlərə də eyni həssaslıqla yanaşmalıdırlar.

Paylaşımda İranda 40 milyona yaxın türk yaşadığı qeyd olunaraq, məktəblərdə türk dilində təhsilin qadağan edildiyi, eləcə də türk dilində adların və kommersiya obyektlərinin adlarının istifadəsi ilə bağlı məhdudiyyətlərin olduğu iddia edilib.

Klub Azərbaycanda məktəblərdə başörtüyü ilə bağlı müzakirələrə də toxunaraq, bu məsələyə etiraz edənlərin İranda yaşayan türklərin hüquqları ilə bağlı səssiz qalmasını tənqid edib.

“Traktor” FK paylaşımında müsəlmanların hüquqlarının müdafiəsinin yalnız müəyyən məsələlərlə məhdudlaşmamalı olduğunu vurğulayaraq, İranda yaşayan türklərin də müsəlman olduğunu xatırladıb.

Paylaşımın sonunda klub bu sualı ünvanlayıb: “Niyə söhbət İrandan gedəndə susursunuz?!”.