ABŞ Prezidenti Donald Tramp Tehranın dinc siyasət yürüdəcəyi təqdirdə İrana qarşı sanksiyaları ləğv edəcək.

Adalet.az-ın məlumatına görə, bunu ABŞ lideri "Fox News"a müsahibəsində deyib.

“Əgər onlar sülhpərvər ola bilsələr və bizə daha heç bir zərər verməyəcəklərini göstərə bilsələr, mən sanksiyaları ləğv edəcəyəm”, - o deyib.

Prezidentin sözlərinə görə, İrana qarşı sanksiyaların ləğvi “böyük əhəmiyyətli olacaq”. Eyni zamanda Tramp faktiki olaraq İranın gizli nüvə obyektinə malik olduğunu iddia edib.

“Biz bilirdik ki, İranın çoxlu nüvə obyektləri var, yəqin ki, üç əsas obyekt və daha biri”, - o deyib.

Eyni zamanda, Amerika lideri hesab etmir ki, Tehran ABŞ-nin zərbələrinə başlamazdan əvvəl zənginləşdirilmiş uranı nüvə obyektlərindən çıxara bilib. "Xeyr, əvvəla, bunu etmək çox çətindir. Bu, çox təhlükəlidir. Bundan başqa, heç kim Fordo obyektini vuracağımızı düşünmürdü, çünki hamı onun keçilməz olduğunu deyirdi. Məncə obyektdə insanlar var idi, deyirlər, orada maşınlar var. Bu insanlar bombanın düşəcəyi ehtimalı yüksək olan girişi betonlamağa çalışırdılar", - o əlavə edib.