“Tibb müəssisələrində havanın bakterioloji müayinəsi xəstəxana daxili infeksiyaların qarşısını almaq, dezinfeksiya tədbirlərinin və havalamdırma sistemlərinin effektiv olduğunu, sanitariya-gigiyenik vəziyyəti qiymətləndirmək məqsədilə həyata keçirilir”. 

Adalet.az xəbər verir ki, bu barədə “Sağlam radio” nun (93 FM) “Sağlam səhər” efirində Səhiyyə Nazirliyi Respublika Gigiyena və Epidemiologiya Mərkəzinin mikrobioloqu Qumru Qaibova deyib.

Onun sözlərinə görə, hazırda Səhiyyə Nazirliyi Respublika Gigiyena və Epidemiologiya Mərkəzinin bakterioloji laboratoriyasında müayinələr aspirasiya üsulu ilə aparılır:

“Müayinə üsulunun üstünlüyü dəqiqliyinin yüksək olmasıdır. Tibb müəssisələrindən hava nümunəsini Səhiyyə Nazirliyi Respublika Gigiyena və Epidemiologiya Mərkəzinin bakterioloji laboratoriyasının tibb personalı havasoran cihaz (Aspirator) vasitəsilə götürür. İçərisində mühit olan petri kasası hava cihazın daxilinə yerləşdirilir və müəyyən həcmdə hava (100-500 l) qida mühitindən keçirilir. Havada olan mikroorqanizmlər qida mühitinin üzərinə hopur. Götürülmüş hava nümunəsi Səhiyyə Nazirliyi Respublika Gigiyena və Epidemiologiya Mərkəzinin bakterioloji laboratoriyasına gətirilərək, termostatda inkubasiya olunur. Əmələ gələn kolonyalar sayılır və 1 kub metr havaya görə hesablanır. Alınan nəticə sanitariya normalara uyğun olmalıdır”.

Dediyinə görə, Səhiyyə Nazirliyi Respublika Gigiyena və Epidemiologiya Mərkəzinin tabeliyində olan ərazi Respublika Gigiyena və Epidemiologiya Mərkəzləri tərəfindən plan üzrə tibb müəssisələrdən götürülmüş  hava nümunələrinin bakterioloji müayinəsi zamanı çirklənmə aşkar edilərsə, müəssisə rəhbərinə xəbərdarlıq edilir:

“Nöqsanların aradan qaldırılması üçün təkliflər verilir. Bu təkliflərin icrasına nəzarət məqsədilə təkrar laborator müayinələr aparılır”.