Xpress.az xəbər portalının fəaliyyətə başlamasından bir il ötür. Ötən bir il ərzində portal informasiya məkanında öz yerini tutmaq, oxuculara operativ, obyektiv və aktual xəbərlər çatdırmaq istiqamətində fəaliyyət göstərib.

Yarandığı gündən etibarən gündəmin nəbzini tutmağı, cəmiyyəti maraqlandıran məsələləri işıqlandırmağı və ictimai əhəmiyyətli mövzuları diqqətdə saxlamağı qarşısına məqsəd qoyan Xpress.az bir il ərzində öz media yolunu formalaşdırmağa çalışıb.

Portalın fəaliyyətində ölkədə və dünyada baş verən hadisələrlə yanaşı, sosial problemlərin işıqlandırılması, mədəniyyət, təhsil, turizm və digər sahələrdə aktual mövzuların ictimaiyyətə çatdırılması da mühüm yer tutur.

Müasir dövrdə medianın əsas missiyalarından biri yalnız xəbər vermək deyil, həm də cəmiyyəti düşündürən məsələlərə diqqət çəkmək, ictimai müzakirələrə töhfə vermək və informasiya etibarlılığını qorumaqdır. Xpress.az da gələcək fəaliyyətində bu prinsipləri əsas tutaraq oxucularının etimadını qazanmağı və peşəkar jurnalistika ənənələrinə sadiq qalmağı hədəfləyir.

Bir il yeni bir media platforması üçün həm təcrübə, həm də gələcək inkişaf yolunun başlanğıcıdır. Qarşıda daha çox mövzuya toxunmaq, maraqlı reportajlar hazırlamaq, cəmiyyətin səsini aidiyyəti ünvanlara çatdırmaq və informasiya məkanına töhfə vermək kimi hədəflər dayanır.

Biz də "Ədalət" qəzetinin kollektivi olaraq başda Xpress.az saytının baş redaktoru Xəyalə Rəis olmaqla, bütün heyəti təbrik edir və uğurlar arzulayırıq!