Amerika Birləşmiş Ştatları qüvvələri İranın neft ixracı üçün strateji əhəmiyyət daşıyan Xarq adasında hərbi hədəflərə zərbələr endirib.

Adalet.az xəbər verir ki, bunu ABŞ Prezidenti Donald Tramp Floridaya səfərdən əvvəl jurnalistlərə açıqlamasında deyib.

Tramp qeyd edib ki, əməliyyat zamanı adadakı hərbi obyektlər hədəfə alınıb, lakin neft infrastrukturu vurulmayıb:

“Əgər gəmilərin Hörmüz boğazından təhlükəsiz keçidinə icazə verilməsə, neft obyektlərinə zərbə endirilməsi ilə bağlı qərar yenidən nəzərdən keçirilə bilər. İranın göz bəbəyi sayılan Xarq adasındakı hərbi hədəfləri tamamilə məhv etdik”.

ABŞ Prezidenti, eyni zamanda, İran ordusunu silahı yerə qoymağa çağırıb:

“İran heç vaxt nüvə silahına sahib olmayacaq və regionu təhdid etmək imkanına malik olmayacaq”.

Qeyd edək ki, İranın materik sahillərindən təxminən 30 kilometr məsafədə yerləşən Xarq adası ölkənin neft ixracı üçün əsas mərkəzlərdən biri hesab olunur və İranın ixrac etdiyi neftin təxminən 90 faizi məhz bu adadan daşınır.