Dünyada baş verən mürəkkəb geosiyasi proseslər fonunda beynəlxalq dialoq platformalarının əhəmiyyəti daha da artır. Bu baxımdan Bakıda keçirilən XIII Qlobal Bakı Forumu qlobal məsələlərin müzakirəsi üçün mühüm siyasi platforma kimi xüsusi diqqət çəkir. Azərbaycanın belə bir mötəbər tədbirə ev sahibliyi etməsi ölkəmizin beynəlxalq nüfuzunun və siyasi çəkisinin artdığını bir daha təsdiqləyir.

Bu fikirlər aia.az saytının baş redaktoru Azər Məmmədovun forumla bağlı şərhində yer alıb.

Media təmsilçisi qeyd edib ki, forumda Prezident İlham Əliyev tərəfindən səsləndirilən fikirlər müasir beynəlxalq münasibətlər sistemində baş verən proseslərin düzgün qiymətləndirilməsi baxımından xüsusi əhəmiyyət kəsb edir: “Cənab Prezident çıxışında bu gün dünyada yeni çağırışların və risklərin artdığını, beynəlxalq təhlükəsizlik sisteminin ciddi sınaqlarla üzləşdiyini diqqətə çatdırdı. Dövlət başçısı vurğuladı ki, müasir dünyada sabitliyin və təhlükəsizliyin qorunması üçün dövlətlər arasında qarşılıqlı hörmətə, beynəlxalq hüququn prinsiplərinə və konstruktiv dialoqa əsaslanan münasibətlər mühüm əhəmiyyət daşıyır. Məhz bu baxımdan Qlobal Bakı Forumu müxtəlif ölkələrin siyasi liderləri, ekspertləri və ictimai xadimləri üçün açıq müzakirə meydanı rolunu oynamaqla xüsusi önəm daşıyır.”

Baş redaktorun təhlilində xüsusi olaraq vurğulanır ki, Prezident İlham Əliyevin çıxışında səsləndirilən fikirlər Azərbaycanın beynəlxalq siyasətdə oynadığı rolu daha aydın şəkildə ortaya qoyur: “Cənab Prezident bir daha qeyd etdi ki, Azərbaycan hər zaman dialoqa, əməkdaşlığa və qarşılıqlı faydalı tərəfdaşlığa üstünlük verən ölkədir. Dövlət başçısının forumdakı çıxışında səsləndirdiyi “Azərbaycan beynəlxalq əməkdaşlığın gücləndirilməsinə və sivilizasiyalararası dialoqun inkişafına daim töhfə verir” fikri ölkəmizin xarici siyasətinin mahiyyətini çox dəqiq şəkildə ifadə edir. Bu siyasət nəticəsində Azərbaycan bu gün regionda sabitlik və əməkdaşlıq təşəbbüslərinin əsas müəlliflərindən biri kimi çıxış edir.”

Ekspert həmçinin bildirib ki, Prezident İlham Əliyevin çıxışında Azərbaycanın əldə etdiyi uğurların və ölkəmizin beynəlxalq nüfuzunun artmasının əsas səbəbləri də aydın şəkildə izah olunub: “Azərbaycan müstəqil siyasət yürüdən, öz milli maraqlarına əsaslanan qərarlar qəbul edən və regionda sülh və əməkdaşlığa töhfə verən dövlətdir. Bu siyasət sayəsində ölkəmiz yalnız regionda deyil, daha geniş beynəlxalq məkanlarda etibarlı tərəfdaş kimi tanınır. Azərbaycanın təşəbbüsü ilə həyata keçirilən bir çox beynəlxalq layihələr, xüsusilə enerji və nəqliyyat sahələrində əməkdaşlıq platformaları ölkəmizin strateji əhəmiyyətini daha da artırıb. Qlobal Bakı Forumunun müntəzəm şəkildə keçirilməsi də Azərbaycanın beynəlxalq siyasətdə oynadığı rolun artdığını özündə əks etdirən mühüm göstəricilərdən biridir. Bu forum artıq illərdir ki, dünyada aktual problemlərin müzakirə edildiyi nüfuzlu beynəlxalq platformalardan birinə çevrilib. Müxtəlif ölkələrdən gələn siyasətçilərin, ekspertlərin və ictimai xadimlərin Bakıda bir araya gəlməsi Azərbaycanın qlobal dialoq mərkəzlərindən biri kimi qəbul olunduğunu nümayiş etdirir. Bu isə ölkəmizin beynəlxalq nüfuzunun artmasının və Prezident İlham Əliyevin həyata keçirdiyi uğurlu xarici siyasətin nəticəsidir.”
Sonda Azər Məmmədov vurğulayıb ki, XIII Qlobal Bakı Forumunda səsləndirilən fikirlər beynəlxalq əməkdaşlığın inkişafı və qlobal problemlərin həlli istiqamətində mühüm mesajlar verir: “Prezident İlham Əliyevin çıxışı bir daha göstərdi ki, Azərbaycan dünya siyasətində konstruktiv mövqe tutan, sülhü və əməkdaşlığı təşviq edən məsuliyyətli dövlət kimi çıxış edir. Bu baxımdan Qlobal Bakı Forumu yalnız beynəlxalq müzakirə platforması deyil, həm də gələcək əməkdaşlıq istiqamətlərini müəyyənləşdirən mühüm siyasi dialoq məkanıdır.”