Azərbaycanın işıqlı gələcəyinin təminatçısı

Ulu Öndər Heydər Əliyevin dövlətimiz qarşısında xidmətlərinin miqyası ölçüyəgəlməzdir

Hazırda Azərbaycanın inkişaf edərək güclü dövlət olmasında Ümummili Lider Heydər Əliyev və onun ideyalarının xüsusi rolu var. Bu baxımdan Ulu Öndər Heydər Əliyev müstəqil və müasir Azərbaycan dövlətinin banisi hesab olunur. Yeni ictimai-siyasi münasibətlərin formalaşdırılması dövründə dövlətçilik ənənələrinin qorunması məsələsi də bilavasitə Ulu Öndər Heydər Əliyevin adı ilə bağlıdır. Ulu Öndər Heydər Əliyevin xalqımız qarşısındakı ən böyük xidmətlərindən biri Azərbaycan dövlətçiliyinin xilası və bunun sayəsində ölkənin siyasi tarixində yeni bir mərhələnin açılmasıdır. Dahi dövlət xadimi xalqımızı, dövlətimizi əzmkarlığı, atdığı qətiyyətli addımlarıla siyasi bəlalardan hifz etmişdir. Bununla Azərbaycanın işıqlı gələcəyini təmin etmişdir. 1990-cı il ölkəmizin tarixində ağır il olaraq yadda qalıb.

Bu son dərəcə ağır ildə Ümummilli Lider Heydər Əliyev Azərbaycana gəlmişdir. Sonradan həmin günləri xatırlayan dahi rəhbər belə demişdir: “1990-cı ilin yayı idi. Mən buraya gələrkən Naxçıvanı çox çətin bir vəziyyətdə gördüm. Amma eyni zamanda özümü çox rahat hiss etdim. Moskvada məni təqib edirdilər. Hətta yanvar hadisələrindən sonra hərəkətlərimə görə mənə qarşı repressiya planları hazırlanmışdı və onları həyata keçirmək istəyirdilər. Bakıya gələndə xalq tərəfindən mənim gəlişim böyük ruh yüksəkliyi ilə qəbul olundu, lakin hakimiyyətdə olan ayrı-ayrı şəxslər tərəfindən Bakıda yaşamağıma imkan verilməsə də, mən Naxçıvana gələndə Naxçıvan ayağa qalxdı, Naxçıvan məni qucaqladı, bağrına basdı. Son illər çəkdiyim bütün əzab-əziyyəti unutdum. Görünür, mənim Naxçıvana gəlişim taleyin işi imiş”. Onun Naxçıvana gəlməsi 1990-cı ilin 22 iyuluna təsadüf edirdi. Ulu öndər Naxçıvada güclü iradə nümayiş etdirərək öz siyasi fəaliyyətinə başlamışdır. O, 1990-cı il sentyabrın 30-da Azərbaycan və Naxçıvan parlamentlərinə keçirilən seçkilərdə 340 nömrəli Nehrəm Seçki Dairəsindən Azərbaycan parlamentinə, 2 nömrəli Seçki Dairəsindən isə Naxçıvan parlamentinə deputat seçilmişdir.

Daha sonra 1991-ci il sentyabrın 3-də xalqın tələbi ilə Naxçıvan Muxtar Respublikası Ali Məclisinin Sədri vəzifəsinə seçilmişdir. Naxçıvan Muxtar Respublikasının xilası və dirçəlişi Ulu Öndər Heydər Əliyevin adı ilə bağlıdır. Müasir müstəqil Azərbaycan dövlətinin memarı və qurucusu, milli həmrəylik və bütövlüyü təmin edən azərbaycançılıq ideologiyasının banisi, xalqımızın və dövlətimizin xilaskarı, Ümummilli Lider Heydər Əliyevin Azərbaycan xalqı və dövləti qarşısındakı tarixi xidmətləri misilsizdir. Onun dövləti qarşısında xidmətlərinin miqyası ölçüyəgəlməzdir. Məhz buna görə də ulu öndərin xalqımızın qəlbində dərin iz buraxmış dahi obrazı formalaşıb. Xalqına bağlı olan Heydər Əliyev Naxçıvanın inkişafı və yüksəlişi üçün əlindən gələni əsirgəməmişdir. Ümumiyyətlə, Ulu Öndər Heydər Əliyevin həm SSRİ dönəmində, həm də müstəqillik illərində ölkəmizə rəhbərliyi dövründə xalqın rifah halının daha da yaxşılaşdırılması, respublikamızın tərəqqisinin təmin olunması və digər istiqamətlərdə tarixi əhəmiyyətə malik olan misilsiz işlər görülüb. 1990-1993-cü illərdə blokada şəraitində yaşayan Naxçıvan Muxtar Respublikasına yeni nəfəs gəldi. Buranın ictimai-siyasi həyatına yeni ab-hava yarandı. Ulu öndər tərəfindən müstəqil dövlət quruculuğu prosesinə yol açan tarixi qərarlar verildi.

Bu qərarlar müstəqil dövlətin yaradılması üçün əhəmiyyətli ideoloji baza rolunu oynamışdır. Müharibənin davam etdiyi, sənaye məhsullarının çatışmadığı, elektrik enerjisinin olmadığı, sosial-iqtisadi durumun kəskin olduğu şəraitdə Ali Məclisin sədri seçilən Ulu Öndər Heydər Əliyev həyata keçirdiyi islahatlar, gördüyü tədbirlər və işlər sayəsində Naxçıvanda sabitliyin, tərəqqinin və həmrəyliyin təmin olunmasına nail oldu. Prezident İlham Əliyev həmin dövrdə Naxçıvan Muxtar Respublikası Ali Məclisinin qəbul etdiyi qərarların tarixi əhəmiyyətindən danışarkən demişdir: “Məhz 1990-cı illərin əvvəllərində Naxçıvanın taleyi həll edilirdi. Əgər o illərdə Heydər Əliyev Naxçıvanda olmasaydı və naxçıvanlılar ulu öndərin ətrafında sıx birləşməsəydilər, Naxçıvanın taleyi çox ağır ola bilərdi.

Çünki artıq erməni millətçiləri Azərbaycana qarşı işğalçı siyasətini başlamışdılar və onların məkrli planlarında Naxçıvanın işğalı da var idi. O vaxt Naxçıvanda vəziyyət böyük çətinliklər hesabına sabit olaraq qalırdı. Ovaxtkı Azərbaycan rəhbərliyi də Naxçıvana ögey münasibət bəsləyirdi, heç bir yardım etmirdi, əksinə, Naxçıvanda sabitliyi pozmaq və vəziyyəti gərginləşdirmək üçün çox çirkin əməllər edirdi. Ancaq naxçıvanlılar həmişə olduğu kimi, müdrikliyini göstərərək ulu öndərin ətrafında bir yumruq kimi sıx birləşdilər və həm erməni işğalçılarına tutarlı cavab verdilər, onları yerinə oturtdular, həm də Azərbaycanın mərkəzi hökumətinə də öz etiraz səslərini qaldıraraq bildirdilər ki, Naxçıvanda o məkrli ssenari keçməyəcəkdir”. Artıq Azərbaycan dünyada söz və güc sahibi olan dövlətdir. Müasir Azərbaycan dövlətinin dünyadakı hazırkı yeri və mövqeyi ulu öndərin layiqli davamçısı Prezident İlham Əliyevin apardığı siyasət əsasında müəyyənləşir.