Sumqayıt şəhər sakini Səfullayev Xanlar Əliheydər oğlu 7 nəfər  müəllimin adından Azərbaycan Respublikasının deputatı Aqil Abbasa müraciət edərək yazır:

«Sumqayıt Evdə Fərdi Təhsil məktəbi  1994-cü ildən sağlamlıq imkanları məhdud uşaqların təhsili ilə bağlı fəaliyyət göstərir. Qanunvericiliyə görə, sağlamlıq imkanları məhdud uşaqlar evdə təhsilə cəlb olunur. Məktəbimizin keyfiyyət göstəricisi çox yüksəkdir. Təkcə bu il məktəbimizin iki məzunu fərqlənmə attestatı almışlar. Buna baxmayaraq, bir aydır ki, məktəbin direktoru Vladim İbrahimov  heç bir səbəb göstərmədən məktəbin bağlandığını bildirir  və bizdən başqa məktəbə keçməyimizi tələb edir. razılaşmayanlara psixoloji təsir göstərir, Əmək Məcəlləsinin  70-ci maddəsinin «c»  bəndi ilə işdən çıxardacağını  deyir. Bununla bağlı Abşeron-Xızı Regional Təhsil İdarəsinə, Elm və Təhsil Nazirliyinə etdiyimiz müraciətlər nəticəsiz qalmışdır. Ona görə də öz adımdan və bu ərizəni  imzalayan müəllimlər adından 30 ildən çox fəaliyyət göstərən Sumqayıt Evdə Fərdi Təhsil məktəbinin heç bir əsas göstərilmədən, Nazirlər Kabinetinin qərarı olmadan bağlanması ilə bağlı yaranmış problemə diqqət göstərmənizi xahiş edirəm».
7 müəllimin imzası. 

REDAKSİYADAN: Səfullayev Xanlar Əliheydər oğlunun ərizəsi Elm və Təhsil naziri cənab Emin Əmrullayevə göndərilib. Ümid edirik ki, cənab nazir müəllimlərin problemlərinin həll  olunması üçün müvafiq göstəriş verəcək. İnanırıq ki, 30 ilə yaxın fəaliyyət göstərən müəllimlərin ən azından başqa təhsil ocaqlarında işlə təmin olunması məsələsi həllini tapacaq.