2025-ci ilin avqust ayında əldə olunan sülh razılaşmaları və "Vaşinqton prosesi" Cənubi Qafqazda onilliklər boyu davam edən siyasi gərginliyi geridə qoyaraq, regionun sosial, mədəni və humanitar mənzərəsini kökündən dəyişdirmək üçün tarixi zəmin yaradıb.

Uzun illər davam edən münaqişə şəraiti mədəni inkişafı müəyyən çərçivələrə salaraq onu ideoloji qarşıdurma müstəvisinə çəksə də, yeni sülh dövrü mədəniyyətin öz əsl mahiyyətinə — azad, yaradıcı və birləşdirici qüvvəyə qayıtmasını təmin edir. Sülhün bərqərar olması ilk növbədə illər boyu dağıntılara və diqqətsizliyə məruz qalmış tarixi-mədəni irsin bərpası və beynəlxalq standartlara uyğun qorunması üçün təhlükəsiz mühit formalaşdırır.

Eyni zamanda, cənab İlham Əliyevin təşəbbüsləri üzərində qurulmuş yeni reallıqda regionda hərbi risklərin aradan qalxması və kommunikasiyaların açılması mədəni turizmin, yaradıcı sənayelərin inkişafına, beynəlxalq festivalların və müştərək incəsənət layihələrinin keçirilməsinə geniş imkanlar yaradır. Humanitar müstəvidə isə bu proses qarşılıqlı etimadın bərpası, akademik mübadilələr və xalq diplomatiyası vasitəsilə region xalqları arasında sağlam dialoqun qurulmasına xidmət edir. Bu mənada, 1 illiyini qeyd etdiyimiz Vaşinqton prosesinin gətirdiyi sabitlik mədəniyyətin sadəcə keçmişin mirası kimi qorunmasını deyil, həm də gələcəyə yönəlmiş azad və dinamik bir inkişaf modelinə çevrilməsini şərtləndirir.

İbrahim Zahidli, 

siyasi şərhçi 

Geneva EU Business Scool” məzunu