Bakı şəhəri Yasamal rayonu 38 saylı tam orta məktəbdə görkəmli satirik mətbuat nümunəsi olan Molla Nəsrəddin jurnalının 120 illiyinə həsr olunmuş tədbir təşkil edilib.

Tədbir məktəbin Azərbaycan dili və ədəbiyyat müəlliməsi Nəzakət Seyfəlovanın  təşkilatçılığı ilə baş tutub. Tədbirdə 8-ci sinif şagirdləri jurnalın ideya və mövzularını əks etdirən müxtəlif əl işləri nümayiş etdiriblər. Şagirdlər həmçinin karikaturalar çəkərək, müxtəlif obrazları canlandırıb səhnəciklər təqdim ediblər.

Keçirilən tədbirin əsas məqsədi şagirdlərə milli mətbuat tarixini, satiranın cəmiyyətdəki rolunu və Cəlil Məmmədquluzadənin rəhbərliyi ilə nəşr olunan jurnalın Azərbaycan ədəbiyyatındakı əhəmiyyətini aşılamaq olub.

Məktəbin direktoru İradə İmanbəyli tədbirin şagirdlərin yaradıcılıq bacarıqlarının inkişafı və onların milli-mənəvi dəyərlərə bağlı ruhda yetişməsi baxımından mühüm əhəmiyyət daşıdığını vurğulayıb.

Tədbir iştirakçılar tərəfindən maraqla qarşılanıb və şagirdlərin hazırladığı yaradıcı işlər xüsusi rəğbət qazanıb.