“28 May Azərbaycan xalqının tarixində milli qürurun, azadlıq mübarizəsinin və dövlətçilik iradəsinin ən parlaq simvollarından biridir.1918-ci ildə qurulan Azərbaycan Xalq Cümhuriyyəti bütün Şərqdə ilk demokratik respublika kimi tarixə düşərək xalqımızın müstəqil yaşamaq əzmini dünyaya nümayiş etdirdi”. 

Bunu Adalet.az-a açıqlamasında “Yeni Xətt” Siyasi Tədqiqatlar Mərkəzinin rəhbəri Ramil Hüseynov deyib.

O, bildirib ki, bu şanlı tarix bizim milli kimliyimizin və dövlətçilik ənənələrimizin əsas sütunlarından biridir:

“Bu gün müstəqil Azərbaycan güclü siyasi iradə, milli birlik və qətiyyətli dövlət strategiyası ilə regionun aparıcı dövlətlərindən birinə çevrilib. Prezident rəhbərliyi altında ölkəmiz öz suverenliyini daha da möhkəmləndirərək beynəlxalq arenada söz sahibi olan güclü dövlət statusunu davamlı şəkildə gücləndirir. Azərbaycanın əldə etdiyi siyasi, iqtisadi və diplomatik uğurlar xalqımızın birliyinin nəticəsidir. Müstəqilliyimiz bizə əmanət deyil, böyük mübarizə və şəhid qanı bahasına qazanılmış müqəddəs dəyərdir. Bu dəyəri qorumaq hər bir vətəndaşın milli məsuliyyətidir. Xalqımız tarix boyu olduğu kimi bu gün də dövlətinin yanında dayanaraq milli maraqlarımızı qətiyyətlə müdafiə edir. 28 May-Müstəqillik Günü münasibətilə bütün Azərbaycan xalqını səmimi qəlbdən təbrik edir, dövlətimizə qüdrət, xalqımıza rifah və əbədi istiqlal arzulayıram. Yaşasın müstəqil Azərbaycan!”.

Vasif ƏLİHÜSEYN