İranın xarici işlər naziri Abbas Əraqçi İsrailə qarşı Tehran vaxtı ilə səhər saat 4-ə qədər davam edən hərbi əməliyyata görə ölkənin silahlı qüvvələrinə minnətdarlığını bildirib.

Adalet.az xəbər verir ki, bu barədə "Mehr" agentliyi məlumat yayıb. 

Yeni zərbələr barədə xəbərlər və ABŞ-nin atəşkəslə bağlı bəyanatları fonunda nazir vurğulayıb ki, Tehran İsraillə heç bir razılaşmaya getməyib, lakin İsrail tərəfi zərbələri dayandıracağı təqdirdə hücumları dayandırmağa hazırdır.

"Bütün iranlılarla birlikdə sevimli ölkəmizi son damla qanına qədər müdafiə etməyə hazır olan və düşmənin hər hücumuna cavab verən silahlı qüvvələrimizə təşəkkür edirəm", - agentlik nazirdən sitat gətirib. 

İyunun 23-də axşam İran da Qətərdəki ABŞ-nin Əl-Udeyd aviabazasına raket zərbəsi  endirib və bunun ABŞ-nin İrana hava hücumlarından sonra cavab əməliyyatının bir hissəsi olduğunu iddia edib. İran raketlərin hədəfləri vurduğunu iddia etsə də, ABŞ və Qətər bunu təkzib edərək, bütün raketlərin hava hücumundan müdafiə sistemləri tərəfindən ələ keçirildiyini bildirib. İtkilər barədə məlumat verilmir.

Daha sonra, iyunun 24-nə keçən gecə İsrail ordusu İran ərazisindən yeni raket atışlarını qeydə alıb. İsrailin müxtəlif yerlərində, ölkənin həm şimalında, həm də cənubunda, o cümlədən Beer-Şevada həyəcan sirenləri səslənib. İsrail mediasının məlumatına görə, raketlərdən biri yaşayış binasına düşüb, mülki vətəndaşlar yaralanıb.

Məlumata görə, dağıntılar altında insanların axtarışı hazırda davam edir və qaz sızması ehtimalı ilə bağlı narahatlıqlar var.

ABŞ prezidenti Donald Tramp bir müddət əvvəl İran və İsrail arasında atəşkəsin əldə edildiyini və "12 günlük müharibə"nin bitmək üzrə olduğunu bildirib. O, əvvəlcə İranın hücumları dayandıracağını, sonra İsrailin 12 saat sonra atəşi dayandıracağını, 24 saat sonra isə münaqişənin rəsmi olaraq bitəcəyini bildirib. O, bunu "tarixi razılaşma" adlandırıb və əlavə edib ki, dünya "yenidən daha təhlükəsizdir".