KÜÇƏ MUSİQİÇİLƏRİ KİMƏ MANE OLUR?
«Baku TV»nin «Xəbərlər» proqramında küçə musiqiçiləri ilə bağlı bir süjeti izlədim. Turizm Agentliyinin məsul işçisi bildirdi ki, onlar qanuna əsasən axşam saat 20-yə qədər fəaliyyət göstərə bilərlər. Bu qanunu pozanların lisenziyası əlindən alınır. Nizami küçəsinin sakinləri də gileyləndilər ki, küçə musiqiçiləri saat 8-dən sonra onları narahat edir, hətta yatmağa qoymur.
Avropanın, eləcə də Amerikanın bütün böyük şəhərlərində küçə musiqiçiləri fəaliyyət göstərir. Orda qanun necədir, bilmirəm, yəni saat neçəyə qədər çalıb-oxuya bilərlər.
Əvvəla, küçə musiqiçilərinin çoxu səsgücləndiricidən istifadə etmir. Səsgücləndiricidən istifadə edənlər aşağı səsə nizamlayırlar. Bu səs evində yatan bir adamı narahat edə bilməz.
Küçə musiqiçiləri arasında həqiqətən peşəkarlıq səviyyəsində ifaçılar da var. Məsələn, «Azneft» dairəsində yeraltı tuneldə bir tar çalan var, hərdən ordan keçəndə mütləq ayaq saxlayıb dinləyirəm və xoşuma gəlir. Görürəm ki, başqaları da ayaq saxlayıb dinləyir. İmkanı daxilində də hərə gücü çatan qədər futlyara pul atır. Bir də bunlarla adətən Nizami küçəsində rastlaşıram. Heç kəsə mane olmadan həzin-həzin ya qarmonda, ya da akustik gitarada ifa edirlər. Camaat da onlara hörmət edir. Yəqin lisenziyası olanlar da qazandıqları puldan dövlətə vergi ödəyirlər.
Qaldı sakinləri narahat etməyə, onda hər axşam restorandakı musiqiçilər, toyxanalardakı musiqiçilər o ətrafda yaşayanları narahat etmir saat 12-dək?
Özü də səsgücləndiricilərə o qədər səs verirlər ki, səninlə bir stolda oturan adamın nə dediyini eşidə bilmirsən.
Necə ola bilər ki, qanun toyxanalara, restoranlara şamil edilmir, küçədə beş-on manata çalışan musiqiçilərə tətbiq olunur?
Dostum, görürsən ki, küçə musiqisi səni narahat edir, pəncərəni ört yat da!
Aqil ABBAS