Ağ Evdə avqustun 8-də keçirilən üçtərəfli zirvə görüşü hələ bundan sonra da uzun illər təhlil olunacaq, onun əsl dəyərinə layiqli qiymət veriləcəyi hazırkı səngiməyən müzakirələrdən bəlli olur.

Adalet.az xəbər verir ki, müzakirələrə artıq Ermənistan Respublikasının Birinci Prezidenti olmuş  Levon Ter-Petrosyan da qoşulub. Bu görüşü də, qarşıya qoyulan öhdəlikləri də bəyənməyən sabiq prezident mediaya bunları deyib:

"Hakimiyyət, təbii ki, bunu sevinclə ən böyük uğurlarından biri hesab edir. Parlament müxalifəti isə təbii ki, sazişdə nəinki müsbət bir şey görmür, əksinə, onun icrasının dağıdıcı nəticələrini proqnozlaşdırır. Bəzi razılaşmalar haqqında danışmaq isə, yalnız razılaşmanın icrasından sonra mümkün olacaq".

Petrosyan arxayın olduğu, "dost" bildiyi ölkələrdən konkret addım görmədiyinə görə narahatçılığını da gizlətməyib:" Dost İran rəsmilərinin müxtəlif qiymətləndirmələri və xüsusən də Rusiyanın demək olar ki, tamamilə susması məni hələ də bir qədər çaşdırır. İran diplomatiyası o qədər incədir ki, onu dərhal dərk etmək bəzən çətin olur".

Hiss olunur ki, Ermənistanın sonuncu nəfəsliyi olan İranın da Ermənistandan üz çevirməsini təsəvvür etmək belə istəməyən sabiq erməni prezidenti narahatçılığını bu sözlərlə ifadə edir: "Ancaq öz təcrübəmdən sizi əmin edə bilərəm ki, ölkəmiz müstəqilliyini bərpa etdikdən sonra İran nəinki Ermənistana qarşı hər hansı narazılıq və ya qınaq ifadə etməyib, həm də bizim bütün ehtiyaclarımıza müsbət cavab verib. Bir sözlə, Ermənistanla İran arasında 30 ildən çox davam edən münasibətlərdə heç bir anlaşılmazlıq görməmişəm".

P.S. Levon Ter-Petrosyan bəlkədə çox qocaldığı üçün anlamır ki, əslində İran 2 il əvvəl, Ermənistan hakimiyyəti ABŞ qoşunlarını Qafqaza gətirəndə inciklik baş verib. İndi isə ABŞın həm ordusu, həm də şirkətləri Zəngəzurda, yəni İranın ağzının içində olacaq. Bu isə İranı "mehriban qonşu" olmağa peşman edən ən başlıca amildir.

Əntiqə Rəşid