Biz uşaq olanda bir telekanalımız, bir mavi ekranımız vardı. Orda isə hər gün yolunu gözlədiyimiz, zövqümüzə uygun cizgi filmlərini izləyərdik.

Psixoloqlar hesab edir ki, uşaqların həyatında və psixoloji inkişafında cizgi filmlərinin böyük rolu olduğu danılmaz faktdır. Ona görə də cizgi filmlərinin psixo-pedaqoji mahiyyətini bilmək vacibdir. Psixoloqların fikrincə, düzgün seçilən cizgi filmləri uşaqların inkişafına müsbət təsir edir, onların dünyagörüşünü formalaşmasında yardımçı olur. Sovet dönəmində çəkilən cizgi filmləri tam anlamı ilə uşaqları tərbiyələndirirdi. Bu gün sizə elə cizgi filmlərindən biri haqqında danışacağam. Bu 1987-ci ildə "Azərbaycanfilm" Kinostudiyasının istehsalı olan “Lovğa fil balası” qısametrajlı cizgi filmidir.

Adalet.az xəbər verir ki, adıgedən filmin ekranlara çıxmasından 35 il ötür. Bir zamanların bütün kiçik yaşlı tamaşaçıları bu filmlərə dövlət televiziyasında dəfələrlə baxardılar.

Rəngli, 8,5 dəqiqəlik kadr bir hissədən ibarətdir. Uşaq janrında çəkilən “Lovğa fil balası”nın maraqlı süjet xətti uşaqların ruhuna uyun bir üslubdadır. Uşaqların xarakterində olan dəcəlllik fil balasına da məxsusdur. Fil balası özündən balacaları incidir, nəhəngliyi ilə öyünüb heç kəslə hesablaşmaq istəmir. Lakin ondan çox-çox kiçik olan arıların hücumuna məruz qaldıqdan sonra öz əməlindən peşimançılıq çəkir. Başa düşür ki, başqalarını incitmək olmaz. Bu, pis və eybəcər hərəkətdir.

Bəli, bu ekran işi uşaqların müsbət xüsusiyyətlərə malik olmasına, tərbiyələnməsinə evdə valideynlər, bağçada tərbiyəçilər qədər təsir edən ideoloji bir təbliğatdır desək yanılmarıq.

Filmi araya -ərsəyə gətirənləri unudanları yenidə “köhnə uşaqlara” xatırladaq:rejissor: Əsgər Məmmədov,ssenari müəllifi: Əli Səmədov,quruluşçu rəssam: Elçin Axundov, operator: Antonina Korotnitskaya, bəstəkar: Rauf Əliyev, səs operatoru: Marat İsgəndərov, cizgi rəssamı: Rauf Dadaşov, Bəhmən Əliyev, Gülşən Quliyeva, Yuri Meşşeryakov, Arifə Hatəmi, Firəngiz Quliyeva, Solmaz Hüseynova, rəssam: Tamilla Əsgərova (T.Əsgərova kimi), Hüseyn Cavid İsmayılov, Bəhram Qaflanov, Azər Qaryağdı Mahnıların mətni sevilən şair Ramiz Rövşənə məxsusdur.Filmi səsləndirənlər isə mərhum aktrisa Nuriyyə Əhmədova, R.Sabitova və Q.Lunevdir.

P.S. Cizgi filmləri istədiyimiz informasiyanın uşaqlara çatdırmağımız üçün vacib vasitədir. Amma çox təəssüflə qeyd edirik ki, Azərbaycan müstəqillik qazandıqdan sonra Azərbaycan kinomatoqrafiyasının bu sahəsi inkişafdan və yeniliklərdən kənarda qalıb. Qədim tariximizin, folklorumuzin, adət-ənənələrimizin uşaqlar arasında cizgi filmləri vasitəsilə təbliğatı uşaqlarımıza, dolayısı ilə cəmiyyətimizə çox şey qazandırardı....

Hazırda uşaqlar xarici kinostudiyalarda istehsal olunmuş və onlara müsbət heç nə verməyən cizgi filmlərini izləyir... Bunun da fəsadları olacaq.

Əntiqə Rəşid