20 Fevral 2023 22:14
3254
TEXNOLOGİYA

Naxçıvanda daha iki qurumun internet resursları “GOV.AZ”a köçürülüb

Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti tərəfindən Naxçıvan Muxtar Respublikasında dövlət qurumlarının internet səhifələrinin “GOV.AZ” zonasında qeydiyyatdan keçirilməsi və təhlükəsizliyinin gücləndirilməsi ilə bağlı müvafiq tədbirlər görülür.

Naxçıvan Muxtar Respublikası Rabitə və Yeni Texnologiyalar Nazirliyinin mətbuat xidmətindən NUHÇIXAN İnformasiya Agentliyinə verilən məlumata görə, Naxçıvan Muxtar Respublikası Mərkəzi Seçki Komissiyası (nmsk.gov.az) və Naxçıvan Muxtar Respublikası Rəssamlar Birliyinin (nrb.gov.az) informasiya resursları da AzStateNet şəbəkəsinə qoşulub.

Nazirliyin mühəndis-proqramçıları tərəfindən müasir proqramlaşdırma dilləri əsasında hazırlanan yeni internet səhifələrinin təhlükəsizliyinin təmin edilməsi, axtarış sistemlərində qeydiyyatdan keçirilməsi və axtarış sistemlərində ön sıralarda tapılması üçün zəruri texniki tədbirlər həyata keçirilib.

Qeyd edək ki, saytların domen ünvanları da müvafiq qaydada yenilənməklə domenə bağlı e-poçt adresləri ilə təmin ediləcəkdir.