21 Sentyabr 2023 14:13
340
GÜNDƏM

"“Azərbaycan Xankəndidə atəşkəsi pozur" yazmaq  araqarışdırmaqdır"

Xəbər verdiyimiz  kimi, Müdafiə Nazirliyi məlumat yazıb: "Ermənistanın bəzi sosial media hesablarında guya Silahlı Qüvvələrimizin Xankəndi istiqamətində hücuma keçməsi barədə yayılan məlumatlar tamamilə yalandır və dezinformasiya məqsədi daşıyır.

MN bildirir ki, yayılan bu məlumatı qəti surətdə təkzib edirik".

 Məsələ ilə bağlı politoloq Elxan Şahinoğlu açıqlama verib:"Erməni və Rusiya saytları “Azərbaycan atəşkəsi pozaraq Xankəndi istiqamətində atəş açıb” dezinformasiyasını tirajlamaqla məşğuldurlar. Azərbaycanın Qarabağın tamamını nəzarətə götürməsini həzm etmək istəmirlər. Yevlaxda ermənilər növbəti kapitulyasiya sənədinə imza atsalar da, içərilərindəki təxribatçıların və onlara dəstək verən xarici mərkəzlərin vəziyyəti gərginləşdirmək istəkləri istisna deyil.

Ona görə daxili qoşunlarımızın Xankəndinə və Qarabağın ermənilər yaşayan digər məntəqələrinə daxil olması mütləq şərtdir, bu məsələləri Rusiya hərbi kontingentinə etibar edə bilmərik. Atəşkəs razılaşmasından bir neçə saat sonra erməni separatçıları Rusiya hərbi kontingentinin nəqliyyat vasitəsinə atəş açıblar və bir neçə hərbçini öldürüblər. Moskvadan səs çıxmadı. Biz öz ərazimizdə həm separatizmlə, həm də onlara açıq və gizli dəstək verən mərkəzlərlə mübarizə aparmaq məcburiyyətindəyik".

 Qeyd edək ki,  Azərbaycanın Xankəndi şəhərində mülki şəxslərin silahlandırılmasını əks etdirən görüntülər yayılıb. Bu barədə erməni Teleqram kanalları görüntülər paylaşıb. Görüntülərdə mülki geyimdə olan şəxsin çiynində avtomat asıldığı görünür. Bu da qarşı tərəfin bütün beynəlxalq normaları pozaraq mülki şəxslərə silah verdiyini və bundan təxribat məqsədilə istifadəni planlaşdırdığı ehtimal olunur.

 Əntiqə Rəşid