Psixoloqların qənaətinə görə, bəzi insanlar münasibətlərdə etdikləri yaxşılıqları daim gündəmə gətirərək qarşı tərəfin özlərini borclu hiss etməsinə səbəb ola bilərlər. Mütəxəssislər bildirirlər ki, müəyyən ifadələrin davamlı təkrarlanması həmin şəxsin qarşı tərəfi günahlandırmasına, daim tərif gözləməsinə və özünü qurban roluna qoymasına gətirib çıxarır. Bu cür yanaşma zamanla münasibətlərdə etimad və tarazlıq problemlərinə yol aça bilər.

"Heç kimin olmayanda mən yanında idim"

Adalet.az xəbər verir ki, "Heç kimin olmayanda mən yanında idim" ifadəsi insanın keçmişdə etdiyi fədakarlıqları daim xatırladaraq qarşı tərəfdən əvəz gözlədiyini göstərə bilər. Bu ifadəni işlədən şəxslər keçmişdə verdikləri dəstəyi bir növ borc kimi təqdim edərək qarşı tərəfin özünü günahkar hiss etməsinə səbəb ola bilərlər. Xüsusilə çətin anlarda göstərilən dəstəyin daim xatırladılması münasibətdə qarşılıqlı anlaşmadan daha çox bir hesablaşma mühiti yarada bilər. Minnətdarlıq gözləntisinin təzyiqə çevrilməsi münasibətin sağlam quruluşuna da xələl gətirə bilər.

Çatışmayan cəhətlərə köklənirlər
Nankor davranış sərgiləyən insanlar sahib olduqları dəyərləri qiymətləndirmək əvəzinə, çox vaxt çatışmayan cəhətlərə diqqət yetirirlər. Onlar özləri üçün edilən yaxşılıqları və təklif olunan imkanları arxa plana keçirir, edilməyənləri daha çox önə çəkə bilirlər. Bu yanaşma insanın ətrafından gördüyü dəstəyi yetərli hesab etməməsinə və münasibətlərində daim narazılıq yaşamasına səbəb ola bilər.

"Bizə borclusan"

"Sənin üçün bu qədər şey etdik, bizə borclusan" kimi ifadələr edilən yaxşılıqların qarşılıq gözləntisi ilə əlaqədar olduğunu göstərir. Birinə dəstək olub, daha sonra bu dəstəyi qarşı tərəf üzərində bir təzyiq vasitəsi kimi istifadə etdikdə münasibətin tarazlığı pozula bilər. Edilən fədakarlıqların daim xatırladılması qarşı tərəfin özünü sərbəst hərəkət edə bilmədiyi bir münasibət içində hiss etməsinə səbəb olur.

"Təşəkkür etmirsən"
"Sənin üçün nəsə edirəm, amma heç təşəkkür etmirsən" cümləsi isə daim təriflənmək və qiymətləndirilmək gözləntisini ortaya qoyur. Edilən yaxşılıqdan sonra təşəkkür edilməsi təbii olsa da, bunun daim tələb olunması münasibətin səmimiyyətinə zərər vura bilər. Psixoloqların fikrincə, göstərilən köməyin və fədakarlıqların daim qarşı tərəfə xatırladılması zamanla sevgi və həmrəyliyin yerini hesablaşma anlayışının almasına gətirib çıxara bilər. Buna görə də sağlam münasibətlərdə edilən yaxşılıqların müqabilində daim minnətdarlıq gözləmək əvəzinə qarşılıqlı hörmət və anlaşmanın qorunması böyük əhəmiyyət daşıyır./Milli.az