Ukrayna prezidenti Volodimir Zelenski Avropa Parlamentinin sədri Roberta Metsola ilə Kiyevdə keçirdiyi birifinq zamanı ölkəsinin müharibəyə hər il 120 milyard dollar xərclədiyini deyib. O, bildirib ki, ölkə büdcəsi bunun yalnız yarısını qarşılaya bilir. V.Zelenski müharibəni bitirəcəklərinə də ümid etdiyini bildirib. 

Məsələylə bağlı Adalet.az-a danışan hərbi ekspert Ədalət Verdiyev bildirib  ki, müharibənin başa çatması üçün iki əsas faktor mövcuddur:

“Bunlardan biri tərəflərdən hər hansı birinin məğlubiyyətini qəbul edərək kapitulyasiya aktını imzalaması, digəri isə işğalçı tərəfin beynəlxalq təzyiqlərə tab gətirməyərək müharibəni başa çatdırması ilə bağlı verilən təkliflərin qəbul edilməsindən ibarətdir”.

Hərbi ekspertin sözlərinə görə, real vəziyyətdə Ukraynanın hərbi əməliyyatları birtərəfli qaydada başa çatdırması absurd məsələdir:

“Digər tərəfdən isə Rusiya ərazidə hərbi təşəbbüsə malik olduğu vəziyyətdə Ukraynanın təkliflərinə müsbət cavab verərək müharibəni dayandıracağı da real görünmür”. 

Ə.Verdiyev deyib ki, yaxın prespektivdə ən azından gələn ilin yay ayına qədər müharibənin başa çatması gözlənilmir:

“Çünki müharibənin başa çatması üçün ilkin amillərdən biri də heç olmasa atəşkəsin elan olunmasıdır ki, buna da Ukrayna tərəfi üç ildən artıq bir müddətdə bir dəfə də olsun nail ola bilməyib. Qısa müddətli humanitar atəşkəs isə döyüş əməliyyatlarının dayandırılması ilə nəticələnməyib. Buna görə də Zelenskinin bu bəyanatı hələlik ərazidə baş verənləri özündə əks etdirmir. Əksinə, bu bəyanat real əməliyyatlar teatrında davam edən müharibə ssenarisi ilə tamamilə əks-mütənasibdir. Əgər Zelenski müharibəni dayandıracağına əmindirsə, niyə görə yaxın iki gün ərzində 18 yaşayış məntəqəsindən mülki əhalisini evakuasiya edir. Yəni bizim üçün nə qədər ağrılı olsa da Ukrayna əməliyyatlar zonasında ciddi bir nailiyyətlər əldə etməyib, əksinə, itirdiyi ərazilərin miqyası əldə etdiyi ərazilərindən miqyasından bir neçə dəfə böyükdür. Belə olan halda Rusiyanın atəşkəsə razı olması qətiyyən real görünmür”. 

Vasif ƏLİHÜSEYN