“Azərbaycan Avropa İttifaqı ilə əməkdaşlığı inkişaf etdirməli və öz xarici siyasətini bu istiqamətdə qurmalıdır. ABŞ etibarlı və etimad ediləcək ölkə statusunu itirir. Bu Gürcüstan və Ukrayna nümunəsində özünü göstərdi. Rusiya və Çin ekspionist və işğalçı siyasətlərə malikdir. Qonşularla normal əməkdaşlıq deyil, vassal siyasətinə üstünlük verirlər. Avropa ittifaqı və başda Böyük Britaniya olmaqla yeni dünya siyasi nizamında mövqelərini möhkəmləndirmək istiqamətində ardıcıl siyasət aparırlar”. 

Adalet.az xəbər verir ki, bunu politoloq Məhəmməd Əsədullazadə deyib. 

Politoloqun sözlərinə görə, Rusiya-Ukrayna müharibəsində ABŞ -Rusiya sövdələşməsinin qarşısını Avropa alır:

“Bildirim ki, Almaniya artıq 50 milyard dollardan artıq hərbi paket qəbul edib. Həmçinin Böyük Britaniya və ardınca digər Avropa ölkələri də eyni qərarlar qəbul edirlər. Avropa üçün əsas dəyər olan demokratiyanın da qorunması və inkişaf etdirilməsi əsas prioritet kimi də qəbul edilib. Bunu Almaniyanın kansleri F.Merts D. Trampa cavab olaraq qeyd edib. D.Trampdan sonra, ABŞ-nin  Zəngəzur dəhlizinə marağı zəifləyə bilər. Daha çox bu dəhlizə maraqlı əsas tərəf Avropa İttifaqı olacaq. Böyük Britaniya -Avropa İttifaqı, Türkiyə -Cənubi Qafqaz və Mərkəzi Asiya xətti inkişaf edəcək. Azərbaycan Cənubi Qafqazda yeni siyasi nizam yaradıb. Həmçinin Mərkəzi Asiya ölkələri bu region üzərindən Qərblə əlaqələr qurur. Bu da regionda yeni siyasi transformasiyadır”.

Vasif ƏLİHÜSEYN