Dövlət Dumasına 18 yaşına çatmış əcnəbilərin Rusiya Federasiyasını 30 gün ərzində tərk etmələrini tələb edən qanun layihəsi təqdim edilib.

Adalet.az xəbər verir ki, bununla belə yetkinlik yaşına çatmış miqrant uşaqların ölkədə qalmasının bir yolu olacaq. Onlar iş icazəsi üçün müraciət edə biləcəklər.

Qanun layihəsi qəbul edilərsə, xarici vətəndaşların uşaqlarına da yalnız valideynlərinin iş icazəsinin müddəti ərzində Rusiyada qalmağa icazə veriləcək. Yetkinlərdən özləri və hər bir uşaq üçün sabit məbləğdə fərdi gəlir vergisi ödəmələri tələb olunacaq. Bundan əlavə, qanun layihəsi aşağı gəlirli xarici vətəndaşlara iş icazələrinin verilməsini və ya yenilənməsini qadağan edəcək. Bu, özləri və bütün asılıları üçün yaşayış minimumundan az qazanan miqrantlara aiddir. Vergi orqanları əcnəbilərin gəlir məlumatlarını Daxili İşlər Nazirliyinə bildirməlidirlər.