Avronest Parlament Assambleyasının İrəvanda keçirilən 12-ci plenar sessiyasında Ermənistan parlamentininin sədri Alen Simonyan Ermənistanla Azərbaycan arasında sülh prosesi, Vaşinqtonda imzalanmış bəyannamə, eləcə də regional əməkdaşlıq üçün yeni təşəbbüslərdən danışıb. 

Adalet.az xəbər verir ki, bu barədə erməni KİV yazıb. 

Spiker qeyd edib ki, Ermənistan və Azərbaycan arasında sülhün bərqərar olması istiqamətində nəzərəçarpacaq irəliləyişlər var: "Bunu Ermənistan və Azərbaycan liderlərinin 2025-ci il avqustun 8-də ABŞ prezidentinin iştirakı ilə Vaşinqtonda imzaladığı birgə bəyannamə sübut edir. Həmin gün iki ölkənin xarici işlər nazirləri də Sülhün və dövlətlərarası münasibətlərin qurulması haqqında Sazişin mətnini paraflayıblar. 

Bəyannamənin qəbulu və sülh sazişinin paraflanması artıq sülhün bərqərar olmasından xəbər verir. Buna baxmayaraq, bir sıra humanitar məsələlər hələ də həll olunmamış qalır". 

O vurğulayıb ki, Vaşinqtonda keçirilən görüşün nəticəsi olaraq Ermənistan Trampın Beynəlxalq Sülh və Rifah yolu (TRIPP) təşəbbüsünün həyata keçirilməsi istiqamətində ABŞ və qarşılıqlı razılaşdırılmış üçüncü tərəflərlə əməkdaşlığı davam etdirəcək: "TRIPP layihəsi Ermənistanın özünün elan etdiyi "Sülhün kəsişməsi" proqramı vasitəsilə problemsiz regional rabitəni təmin etmək fikrindən irəli gəlir. O, həm dəmir yolunun inkişafını, həm də Ermənistan, Azərbaycan və qonşu ölkələr arasında magistral yolların, boru kəmərlərinin, elektrik xətlərinin və rabitə kabellərinin çəkilməsi perspektivini nəzərdə tutur".