İrəvanın mərkəzindəki məktəblərdən birində təhsil alan şagirdin valideyni qalmaqallı fikir səsləndirib.

Adalet.az xəbər verir ki, valideyn   9-cu sinifdə 35 şagirdin içərisində onun da qızının da təhsil aldığını bildirib: "Qızım xəbər gətirdi ki, tarix müəllimi Ermənistan tarixi ilə bağlı lazımsız fikirlər deyib. Qızım müəllimin dərs zamanı onun dediklərindən qəzəblə bizə şikayət edib. Tarix müəllimi sinifdə deyirmiş ki, erməni tarixini deyil, dünya tarixini öyrənin. Erməni tarixini öyrənsəniz, dövlətçilikdən çıxıb təşkilata çevriləcəksiniz, Daşnaksütyun isə erməni xalqına ancaq ziyan vurub”.

Sonra tarix müəllimi izah edib ki, o, gələcək üçün “Dənizdən dənizə Ermənistanı” və ya Artsaxı qaytarmaq arzusunda olan” ermənilər yox, dünya vətəndaşları olacaq ermənilər hazırlamağa çalışır.

Qeyd edək ki, son aylar erməni dövlətinin ictimai həyatı məktəblərdə tədris edilən tarix dərsliyi qalmaqalı ilə çalxalanır. Əslində 7 və 9-cu siniflərin dərsliklərində aparılan dəyişikliklər bir sıra mətləblərdən xəbər verir.
Hakimiyyətə gəldiyi ilk gündən erməni kilsəsi ilə gərginlik yaşayan Ermənistanın baş naziri Nikol Paşinyann göstərişi ilə artıq bir sıra siniflər üçün nəzərdə tutulan “Erməni tarixi” kitabının adı dəyişdirilərək “Ermənistan tarixi” adlandırılıb. Həmin qərar isə cəmiyyətdə, xüsusən də Eçmiədzində ciddi rezonans doğurub. Dərslik üzərində işləyən ekspertlərin etirafına görə, “Erməni tarixi” siyasi tarix deyil, əfsanələr toplusu olduğu üçün ondan imtina etməyin vaxtı çatıb.  Ermənistan məktəblərində tədris edilən tarix kitablarından “Erməni kilsəsinin tarixi” mövzusunun çıxarılmasına nail olub. Bu da kilsə ilə hökumət arasında uçurumun ciddi şəkildə dərinləşdiyini göstərir. Hadisələrin fonunda hakimiyyətin diktəsi ilə tarix kitabların bəzilərinin adı “Vətənim” olaraq dəyişdirilib. Maraqlıdır ki, 7-ci siniflərin dərsliyinə salınan xəritədə Qarabağ Azərbaycanın sərhədləri daxilində göstərilib. 

 Təbii ki, təhsil sahəsindəki bu islahatlar revanşist və "böyük Ermənistan" arzusunda olan separatçı erməniləri qəzəbləndirməyə bilməz.

 Əntiqə Rəşid