“Ukrayna ilə sülh razılaşmasına hazırıq”.

Adalet.az xəbər verir ki, bunu Rusiya Prezidenti Vladimir Putin “Rossiya” dövlət televiziya kanalına müsahibəsində deyib.

O, Ukrayna ilə razılığa gəlməyə hazır olduqlarını, lakin müvəqqəti atəşkəs əvəzinə hər iki ölkənin təhlükəsizliyini təmin edən sülh sazişinə üstünlük verdiklərini bildirib.

Ukrayna Prezidenti Volodimir Zelenskinin ərazi itkilərini qəbul etməyə hazır olması ilə bağlı açıqlamasına münasibət bildirən Rusiya lideri Moskvanın nəzarətində olan əraziləri Rusiyanın tarixi torpaqları adlandırıb. O, həmin ərazilərdə keçirilən səsvermələri də mövqeyinə əsas kimi göstərib.

Putin Rusiyanın döyüş meydanında məğlub edilməsinin real olmadığını deyib. O, həmçinin Avropanın Moskvanı təhlükə kimi təqdim etməsini tənqid edərək, Rusiyanın Avropa ilə müharibəyə hazırlaşmadığını və döyüşmək istəmədiyini bildirib.

“Biz Avropa ilə heç bir müharibəyə hazırlaşmırıq. Biz də döyüşmək istəmirik”, – deyə Putin vurğulayıb. Bununla yanaşı, o, Ukrayna rəhbərliyinin müharibəni davam etdirmək istədiyini iddia edib.

Rusiya Prezidenti 2014-cü ildə Ukraynada böhranın başlanmasından bəri Moskvanın sülh tərəfdarı olduğunu və Kiyevlə razılığa gəlməyə çalışdığını söyləyib.

“Bu gün də razılığa gəlməyə hazırıq. Bu çətin və mürəkkəb vəziyyətin həlli yollarını tapmağa hazırıq”, – deyə Putin bildirib.

O, tərəflərin razılığa gələ biləcəyini vurğulasa da, Rusiyanın qarşıya qoyduğu məqsədlərdən geri çəkilməyəcəyini qeyd edib.

Putin ABŞ Prezidenti Donald Trampın xüsusi nümayəndəsi Stiv Uitkoffla Sankt-Peterburqda keçirilən görüşə də toxunub. Onun sözlərinə görə, tərəflər üçtərəfli əlaqələrin bərpasına hazır olduqlarını bildiriblər.

Rusiya lideri vurğulayıb ki, danışıqların məqsədi hərbi əməliyyatların müvəqqəti dayandırılmasından sonra deyil, yekun sülh sazişi əldə edildikdən sonra Ukrayna və Rusiyanın təhlükəsizliyinin təmin olunması məsələsini müzakirə etməkdir.

Putin Uitkoffun Avropada təhlükəsizlik arxitekturası məsələsinin də həll edilməli olduğu fikri ilə razılaşdığını bildirib.