Adalet.az Vətən müharibəsi qazisi, snayperçi Famil Fərəcovla müsahibəni təqdim edir:

- Famil bəy, ilk öncə özünüzü təqdim edərdiniz.

- Mən Fərəcov Famil Yavər oğlu 10 iyul 1980-cı ildə Cəlilabad rayon Göytəpə şəhərində anadan olmuşam. Göytəpə şəhər Milli Qəhrəman Vüqar Mürsəlov adına 1 nömrəli orta məktəbi bitirdikdən sonra 1999-cu ildə hərbi xidmətə çağırılmışam. 

- Hansı rayonda xidmət etmisiniz?

- Naxçıvanda yerləşən N saylı hərbi hissədə sürücü-mexanik vəzifəsində xidmət etmişəm. Əsgəri xidmətimi başa vurduqdan sonra hərbçi olmağa qərar verdim. Gizirlər məktəbində təhsil aldıqdan sonra tağım komandiri kimi xidmətimə davam etmişəm. 

- Bəs necə oldu ki, Xüsusi Təyinatlı Qüvvələrdə xidmətinizə davam etdiniz?

- 2002-ci ildə Xüsusi Təyinatlılar üçün seçim turunda namizədliyimi vermişəm və seçilmişəm. 700 nəfər şəxsi heyətlə 6 aylıq kursa başladıq və sonda 38 nəfər qaldı. Xüsusi Təyinatlıların kursunu fərqlənmə diplomu ilə bitirmişəm. Noyabr ayından isə Xüsusi Təyinatlıların sıralarında xidmətə başlamışam. Hərbi hissədə keçirilən idman yarışlarında sərbəst güləş üzrə birinci yerə layiq görülmüşəm. Bununla yanaşı, ordu üzrə ən yaxşı snayperçi üzrə birinci yerə layiq görülmüşəm. 

- Ölkədən xaricdə bu yarışlarda iştirak etmisinizmi?

- Əlbəttə. Qazaxıstanda və Belarusiyada keçirilən ən yaxşı snayperçi yarışlarında iştirak etmişəm və yüksək nəticələrim olub. 2008-ci ildən düşmən təxribatının qarşısını almaq üçün mühüm snayper tapşırıqlarında olmuşam. 

- Cəhənnəmə vasil etdiyiniz ermənilərin sayını bilirsiniz?

- Xeyli sayda düşmənin komandir, snayper, rabitəçi, əsgər heyətini və bir nəfər yüksək rütbəli və vəzifəli polkovnikini məhv etmişəm.  

- Neçənci ildə yaralandınız?

- 2011-ci ildə ilk dəfə yaralandım. Həmin vaxt düşmən snayperindən birini vurdum, o biri isə məni vurdu. Xoşbəxtlikdən güllə silahın optik nişangahına dəyib divara girdi. Güllənin və əsas da daş qırıntıları üzümə və gözümə girdi. Bu səbəbdən gözümdən əməliyyat olundum. Əməliyyat zamanı gözümün bülluru götürülüb əvəzində linza qoyuldu. 

- Hadisədən sonra xidmətinizə davam etdinizmi?

- Əlbəttə. Bundan sonra nişan gözümü sağdan sola keçirdim. Çox çətinliklə əvvəlki atış vərdişimi bu gözümdə təkmilləşdirdim. Yenə də beynəlxalq ordu yarışlarında ən yaxşı snayperçi kimi iştirak etmişəm. 2016-cı il Şanlı aprel döyüşlərində də xidmətlərim olub və yüngül yaralanaraq döyüşdən sağ çıxmağı Allah mənə qismət edib. 

- Vətən müharibəsində yüksək nailiyyətləriniz olduğu bildirilir...

- 44 günlük Vətən müharibəsində 100-dən çox ermənini cəhənnəmə vasil etmişəm. Döyüşlər zamanı snayper qrup komandiri vəzifəsində Vətən Müharibəsi Qəhrəmanı Gündüz Səfərlinin taborunda xidmət etmişəm. 2020-ci il oktyabrın 12-də Füzuli rayonunun Gorazilli kəndində düşmənlə yaxın döyüşdə sol ayağımdan güllə yarası və sağ ayağımdan isə əl qumbarasının qəlpə yarasını aldım. Göstərdiyim şücaət və qəhrəmanlığa görə adım Vətən Müharibəsi Qəhrəmanı siyahısında təqdim olunsa da, nədənsə bu ad mənə verilmədi. Amma özüm əvvəl gündən demişdim ki, mənə verilən adı şəhidlərimizə verin. 

- Təbii ki, bu xidmətlərinizə görə təltif olunmusunuz...

- Bir çox orden və medallarla təltif olunmuşam. Müdafiə Naziri adından 20 illik qüsursuz xidmətə görə 3-cü, 2-ci və 1-ci dərəcəli medallarıyla, “Şücaətə görə” medalı, Silahlı Qüvvələrin yaranmasıyla bağlı 10, 90, 95, 100 illik yubiley medallarıyla təltif olunmuşam. Bununla yanaşı, “Qarabağ” ordeniylə, Cənab Prezident və müdafiə nazirinin adından 12 medalla təltif olunmuşam. 2022-ci ildə isə səhhətimdə yaranan problemə görə həkimlərimizin rəyi ilə ordu sıralarından ehtiyata buraxılmışam. 

Vasif Əlihüseyn