“Oğlum Elçibəylə yeznəm Vidadi son anlara qədər bir yerdə sığınacaqda olublar. Vidadinin bir anlıq sığınacaqdan çıxması onun minamyot qəlpələrinə tuş gəlməsinə səbəb olub və o aldığı qəlpə yaralarından şəhid olub”

Bunu Adalet.az-ın əməkdaşıyla söhbəti zamani Birinci Qarabağ müharibəsi veteranı Şünasi Babayev deyib. Şünasi Babayev Vidadi Fərhadovun şəhid qardaşı olduğunu bildirib:

“Vidadinin ölümü bizi dərindən sarsıtdı. Heç bunu gözləmirdik. Vidadi də otuz il Şuşa həsrətiylə yaşadı və sonda Şuşaya qovuşub şəhid oldu. Qardaşı Füzuli də 1991-ci ildə “Alazan” raket qəlpələrindən aldığı yara nəticəsində şəhid olmuşdu. Şuşa işğaldan azad ediləndən sonra isə sevinə-sevinə orda işləməyə getdi. Amma çox təəssüf ki, düşmən gülləsinə tuş gəldi. Görünür Vidadinin də alın yazısı beyləymiş. Allah cəmi şəhidlərimizə rəhmət eləsin”. 

Qeyd edək ki, sentyabrın 19-da Erməni silahlı qüvvələrinin birləşmələrinin Şuşaya terror hücumu nəticəsində mülki şəxs Fərhadov Vidadi Aydın oğlu həlak olub. 

Əlli altı yaşlı V.Fərhadov Şuşa Şəhəri Dövlət Qoruğu İdarəsinin mənzil-kommunal və təmir xidmətində mühəndis kimi çalışırmış. 

Vasif Əlihüseyn