“Fars” agentliyi ABŞ hücumları zamanı İranın neft ixracı üçün strateji əhəmiyyət daşıyan Xarq adasında yerləşən neft infrastrukturunun zədələnmədiyini bildirib.

Adalet.az agentliyə istinadən xəbər verir ki, ABŞ-nin hava hücumlarından sonra adada 15-dən çox partlayış səsi eşidilsə də, neft obyektlərinə zərər dəyməyib.

Bildirilib ki, hücumların əsas hədəfləri İran ordusunun hava hücumundan müdafiə sistemi, Cəvşən dəniz bazası, hava limanının idarəetmə qülləsi və kontinental şelfdə yerləşən helikopter anqarı olub.

Qeyd edilir ki, hücumdan bir neçə saat sonra adanın müxtəlif hissələrində sıx tüstü müşahidə olunub.

Xatırladaq ki, Donald Tramp daha əvvəl ABŞ qüvvələrinin Xarq adasında yerləşən hərbi hədəflərə zərbələr endirdiyini və adadakı bütün hərbi obyektlərin tamamilə məhv edildiyini demişdi.

Tramp həmçinin adadakı neft infrastrukturuna zərbə endirmədiklərini, lakin gəmilərin Hörmüz boğazından sərbəst və təhlükəsiz keçidinə maneə yaradılacağı təqdirdə bu qərara yenidən baxa biləcəklərini bildirmişdi.