ZAMAN GÖSTƏRDİ Kİ, BÖYÜK VƏTƏN MÜHARİBƏSİNİ RUSLAR UDMAYIB
Rusiyanın prezidenti Putin Ukrayna müharibəsi ilə bağlı qismən səfərbərlik elan edib. İndi səfərbərliyə yaşı düşənlər ölkəni tərk etməyə çalışırlar. Moskva-İstanbul aviabileti 8 min manat, Moskva-Bakı aviabileti isə 5 min manatdır.
SSRİ də və indi onun varisi Rusiya da çox millətli dövlətdir və bütün savaşlarda da həmin millətlər son damla qanına qədər vuruşublar. Böyük Vətən Müharibəsində Azərbaycan 400 minə yaxın şəhid verib. Bilirsinizmi onda Azərbaycanda nə qədər əhali yaşayırdı: 1,8- 2 milyon arası. O cümlədən gürcülər, ukraynalılar, belaruslar, özbəklər, qazaxlar, türkmənlər, tatarlar, başqurdlar, Sibir türkləri, Dağıstan xalqları, çeçenlər, inquşlar. Statistikanı araşdırsaq görərik ki, SSRİ ordusunun yarıdan çoxunu bu millətlər təşkil edib.
Hələ SSRİ vaxtı hökuməti bir problem narahat edirdi ki, yaxın 20 ildə ordunun üçdə biri, yəni 30 faizini özbəklər təşkil edəcək. Və Sovet hökuməti bundan qorxurdu.
İndi də Ukrayna ilə müharibədə Rusiya ordusu yenə çoxmillətlidir. Ramzan Kadırova inansaq, Ukraynada 10 min çeçen əsgəri var.
İndi bu qismən səfərbərlik elanından sonra ruslar aradan çıxacaq, yenə qırılan yuxarıda adlarını çəkdiyim millətlər olacaq.
Gürcüstan sərhədində neçə kilometrlik tıxac yaranıb. Səhər oxudum ki, daha başqa bir qonşu ölkənin (təəssüf ki, adını unutdum) sərhədində 30 kilometrlik tıxac yaranıb.
Amma 44 günlük müharibədən əvvəl Aprel döyuşlərində də, Tovuzda iyul döyüşlərində də Bakıda və rayonlarda minlərlə gənc səfərbərlik elan olunmadan hərbi komissarlığın qabağına yığışıb tələb edirdilər ki, onları könüllü olaraq cəbhəyə göndərsinlər.
Cənab prezident 44 günlük savaşda qismən səfərbərlik elan edəndə isə yenə on minlərlə gənc könüllü olaraq cəbhəyə yollandı.
Dünən Moskva televiziyası verir, iki gündür qismən səfərbərlik elan ediblər, cəmi üç könüllü batalyon yaradılıb. Hər batalyonda 300 əsgər götürsək, bu təxminən 1000 nəfər edir.
Ən gülməlisi nədir? Putin elan edib ki, əcnəbilər, yəni Rusiya vətəndaşı olmayan, amma Rusiyada yaşayan qeyri-millətlər ordu ilə birillik könüllü müqavilə bağlasa, sonra onlara Rusiya vətəndaşlığı veriləcək.
Guya Rusiya vətəndaşlığı alman, ingilis, fransız vətəndaşlığı kimi bir şeydir?