Ölkənin demək olar ki, bütün rayonlarında dəyəri on milyon manatlarla olan Olimpiya mərkəzləri tikilib. Hər bir texniki  ləvazimatla  təmin olunub, geniş və rahat  idman zalları, hər biri 3 min tamaşaçı tutan stadionları var. Hər sahə üzrə də məşqçilər dövlətdən maaş alırlar. 

Bir araşdırma  aparıb  baxsınlar  görək bu günədək  bu Olimpiya mərkəzləri Azərbaycana heç olmazsa bir boksçu, bir ağırlıqqaldıran, bir güləşçi, bir üzgüçü və s. yetişdirə bilibmi?!

Hər bir rayonda idman komitəsi  və  regional idman idarələri fəaliyyət  göstərir. Bunların işi nədi? 

Rayon icra başçılarından pambıq, taxıl, heyvandarlıq məhsulları və s. tələb edirlər. Bəs, onlardan niyə  idmana da diqqət göstərməyi tələb etmirlər? 

Vaxtilə Ağdamda Olimpiya   mərkəzi yox idi, idman məktəbi isə keçmiş qaz anbarında yerləşirdi. Mən də yalandan-puşdan güləşə gedirdim.  Çirkli döşəklər, iydən-qoxdan da baş çatlayırdı, amma bu xaraba idman məktəbi Əbülfəz Əliyevin  məşqçiliyi ilə Ceyhun Məmmədov başda olmaqla, dəfələrlə Avropa və dünya çempionu olan 10-a yaxın samboçu yetişdirmişdi. Hələ mən Azərbaycan və SSRİ çempionlarını yazmıram. 

Hacı Əkbər Rüstəmovun məşqçiliyi ilə (Hacı Əkbərin 50 nömrəli  peşə məktəbində yaratdığı güləş zalı təmizliy ilə fərqlənirdi) Azərbaycana və SSRİ-yə  nə qədər adlı-sanlı  çempion  yetişdirmişdi. 

İndi Ağdamda çox bahalı və səliqəli, hər cür maddi-texniki  bazası olan  Olimpiya Mərkəzi  fəaliyyət göstərir. Təəssüf ki, indi nə Əbülfəz Əliyev var, rəhmətə gedib, Hacı Əkbər Rüstəmov da qocalıb, day məşqçilik etmir. 

Bir ara Şahbaz müəllim karate  məktəbi açmışdı, o məktəbin indiki  vəziyyətindən də xəbərim yoxdu. Ona görə  xəbərim yoxdu ki, məktəbdən xəbər yoxdu. 

Stadionunda da o qədər at çapıblar ki, yenidən orda futbol oynamaq üçün nə qədər xərc çəkilməlidir. Ağdam atçılığın mərkəzidi, amma nə qədər  izləyirəm çövkan oyunlarında Ağdamın komandasına rast gəlmirəm. 

Ağdamlılar məndən inciməsin, bunu ürəyim yandığı üçün yazıram. 

Yeri gəlmişkən, bir rayonda təzə stadion tikirlər. İctimaiyyət yığışıb, qonşu rayonun  komandasını da çağırıblar, futbol matçı keçirilir. Birinci hissə qurtarandan  sonra başçı deyir:

- Ə, day bəsdi, oyunu qurtarın, otu xarab etməyin.