BMT Baş Assambleyasının 81-ci sessiyası çərçivəsində Azərbaycanın xarici işlər naziri Ceyhun Bayramov BMT-nin Baş katibi Antonio Quterreşlə görüşüb.

Adalet.az xəbər verir ki, bu barədə XİN məlumat yayıb.

Bildirilib ki, görüşdə regional və beynəlxalq proseslər, Azərbaycanın BMT çərçivəsində fəaliyyəti, dialoq, sabitlik və əməkdaşlığın təşviqində rolu barədə fikir mübadiləsi aparılıb.

Azərbaycanın BMT və onun ixtisaslaşmış qurumları çərçivəsində fəal iştirakı, çoxtərəfliliyə, beynəlxalq hüquqa və BMT Nizamnaməsinin prinsiplərinə verdiyi töhfələr vurğulanıb. Azərbaycanın donor ölkə kimi fəaliyyəti və humanitar təşəbbüsləri də müzakirə olunub.

Tərəflər qlobal iqlim fəaliyyəti və dayanıqlı inkişaf məsələlərinə də toxunublar. Bu çərçivədə Azərbaycanın COP29-a ev sahibliyi etməsi, həmçinin bərpaolunan enerji, nəqliyyat və regional əlaqəlilik sahələrində artan rolu qeyd edilib.

Ceyhun Bayramov Azərbaycan-Ermənistan normallaşma prosesində son irəliləyişlər, Cənubi Qafqazda etimadın qurulması istiqamətində səylər, keçmiş məcburi köçkünlərin qayıdışını dəstəkləyən bərpa-quruculuq işləri və minatəmizləmə fəaliyyəti barədə məlumat verib.