Belə bir replika vermişdik ki, Müdafiə Nazirliyi də var, onun Mətbuat Xidməti də.

Deməli, Mətbuat Xidməti bir məlumat yayıb ki, Laçında bir diversiya qrupu  bizim ərazilərə keçib, birini  yaxalaya biliblər, qalanları qaçıb. Məqsədləri də o imiş ki, haralarısa minalasın. Şəkillər  paylaşır və sair və ilaxır.  Çox gözəl, çox pakizə.

Üstündən  bir az keçir, məlumat yayır ki, yaxalanan hərbçi Karatyan heç demə diversant deyilmiş, gözünə  gün düşüb yolu  azıb və sərhədi pozub, qaytarıb  veriblər  Ermənistana.

Birinci məlumatda onu da qeyd edirdilər ki, Karatyan ona ünvanlanan suallara qeyri-dəqiq, yəni  başqa cür  ifadələr verib və sair və ilaxır.

Dostlar, bizim Müdafiə Nazirliyi ilə bölüşə bilməyəcəyimiz bir şey yoxdur. Müdafiə Nazirliyi bizim ərazi bütövlüyümüzü qoruyan bir təşkilatdır. Və  millət  bu Müdafiə Nazirliyinin zabit və əsgər heyətinə borcludur. 44 günlük  böyük  qələbəmizi də Müdafiə Nazirliyinin  əsgər və zabitləri qazanıb, təbii ki, Ali Baş Komandan İlham Əliyev başda  olmaqla.

Sadəcə olaraq, işinizə diqqətli yanaşmağınızı xahiş edirik, amma bunu bacara bilmirsiniz. Jurnalistlər sizi qabaqlayır. Kəlbəcərdə iki jurnalistin və bir mülki şəxsin terrora  məruz qalması ilə bağlı məlumatı nədən siz yox, Respublika Prokurorluğu  açıqlayır? Ölkənin  müdafiəsi Respublika Prokurorluğuna  yox, Müdafiə Nazirliyinə etibar edilib.

Vallah, deyəsən, Abdulla Qurbani Mətbuat Xidmətini daha yaxşı idarə edirdi.