UEFA FIFA prezidenti Canni İnfantinoya qarşı İsveçrədə cinayət işi açmağa hazırlaşır. Buna səbəb Dünya Çempionatı və digər turnirlərin gələcək kommersiya gəlirlərinin özəl investorlara satılmasını nəzərdə tutan və sonradan ləğv edilən layihə ilə bağlı mümkün maliyyə pozuntuları iddialarıdır.

Adalet.az xəbər verir ki, UEFA cümə axşamı Nyu-Yorkdakı Manhetten məhkəməsinə müraciət edərək, Coşua Kuşnerin təsis etdiyi “Thrive Capital Management” investisiya fondundan layihə ilə bağlı mümkün sübutların təqdim edilməsini tələb edib.

“Thrive” və Kuşner FIFA-nın DÇ də daxil olmaqla, kommersiya fəaliyyətlərini idarə edəcək yeni törəmə şirkətində 20 faizlik pay əldə etməli idilər. Bunun müqabilində şirkətin FIFA-ya 4,2 milyard dollar (3,6 milyard avro) ödəməsi nəzərdə tutulurdu.

“Associated Press”in əldə etdiyi 56 səhifəlik məhkəmə sənədində UEFA-nın hüquqşünasları İsveçrə Cinayət Məcəlləsinin 158-ci maddəsi əsasında İnfantinoya və digər FIFA rəsmilərinə qarşı cinayət işi açılmasının nəzərdən keçirildiyini bildiriblər.

Sənəddə 4,2 milyard dollarlıq məbləğin “bazar dəyərindən saxtakarlıqla aşağı qiymət” olduğu və İnfantino tərəfindən öz xeyrinə təşviq edilə biləcəyi iddia olunur.

İnfantino UEFA da daxil olmaqla, dünya futbolunun aparıcı nümayəndələrinin sərt tənqidlərindən sonra avqustun 1-də satış planından imtina edib.

UEFA isə avqustun 3-də FIFA-ya layihə ilə bağlı hər hansı “müvafiq materialı” məhv etməmək və gizlətməmək barədə xəbərdarlıq edərək, mümkün hüquqi tədbirlərin görüləcəyini bildirib.

UEFA məhkəmə sənədlərində İnfantinonun layihəni FIFA-nın kommersiya potensialını və imkanlarını üzə çıxaracaq təşəbbüs kimi təqdim etdiyini qeyd edib. Təşkilatın iddiasına görə, əslində, plan İnfantino və onun ətrafındakı kiçik bir qrup üçün FIFA-nın ən dəyərli aktivlərindən birində daimi pay əldə etmək və qurumun, üzvlərinin və futbol ailəsinin digər nümayəndələrinin hesabına mənfəət əldə etmək məqsədi daşıyıb.

Sənəddə həmçinin bildirilir ki, İnfantinonun müəyyən etdiyi şərtlərə əsasən, investorlar FIFA-nın kommersiya qolunda cəmi 4,2 milyard dollar qarşılığında daimi maliyyə payı əldə edəcəkdilər. UEFA bunun təxminən 20 milyard dollarlıq şirkət qiymətləndirməsinə uyğun gəldiyini və sövdələşmənin açıq, rəqabətli tender və ya müstəqil qiymətləndirmə əsasında həyata keçirilmədiyini bildirir.

FIFA və “Thrive Capital” nümayəndələrindən məsələ ilə bağlı açıqlama istənilsə də, onlar hələlik şərh verməyiblər.